செய்தி மக்கள் தொடர்பு அலுவலகம் விருதுநகர் மாவட்டம்

சமூகப் பாதுகாப்புத் திட்டத்தின் கீழ் உதவி தொகை பெறும் பயனாளிகள் வங்கிக் கணக்குடன் ஆதார் எண் இணைக்க வேண்டும்.

Sep 25, 2026

சமூகப் பாதுகாப்புத் திட்டத்தின் கீழ் உதவி தொகை பெறும் பயனாளிகள் வங்கிக் கணக்குடன் ஆதார் எண் இணைக்க வேண்டும்.

விருதுநகர் மாவட்டத்தில் சமூகப் பாதுகாப்புத் திட்டத்தின் கீழ் உதவி தொகை பெறும் பயனாளிகளுக்கு இந்திய அரசின் அறிவுறுத்தலின்படி, செப்டம்பர் மாதம் முதல் ஆதார் அடிப்படையிலான பணப்பரிவர்த்தனை முறை அமல்படுத்தப்பட்டுள்ளது. எனவே, இம்மாதம் முதல் பயனாளிகளுக்கான நிதியுதவி அவர்களின் ஆதார் எண்ணுடன் இணைக்கப்பட்ட வங்கிக் கணக்கில் வரவு வைக்கப்படும்.அனைத்து பயனாளிகளுக்கும் அரசின் முறையான நடவடிக்கைகள் மூலம் நிதியுதவி தடையின்றி சென்றடைவதை உறுதி செய்வதற்கான நடவடிக்கைகள் மேற்கொள்ளப்பட்டு வருகின்றன. வங்கிக் கணக்குடன் ஆதார் எண் இதுவரை இணைக்கப்படாத பயனாளிகள், தங்களது வங்கியை அணுகி ஆதார் இணைப்பை மேற்கொள்ளுமாறு கேட்டுக்கொள்ளப்படுகிறார்கள்.இது தொடர்பாக ஏதேனும் சந்தேகம் அல்லது உதவி தேவைப்பட்டால் மாவட்ட ஆட்சியரகத்தில் உள்ள தனித் துணை ஆட்சியர்(ச.பா.தி.) அலுவலகம் மற்றும் ஒவ்வொரு வட்டாட்சியர் அலுவலகத்திலும் உள்ள தனி வட்டாட்சியர் (ச.பா.தி.) அலுவலகங்களில் அமைக்கப்பட்டுள்ள உதவி மையங்களை பயனாளிகள் அணுகலாம். அங்கு தேவையான வழிகாட்டுதலும் உதவியும் வழங்கப்படும்.ஒவ்வொரு பயனாளிக்கும் நிதியுதவி எவ்வித இடையூறும் இன்றி சீராக சென்றடைவதை உறுதி செய்வதில் அரசு உறுதியாக உள்ளது என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

கோ ஆப் டெக்ஸ் நிறுவனத்தின் 30 சதவீத தீபாவளி சிறப்பு தள்ளுபடி விற்பனையினை மாவட்ட ஆட்சித்தலைவர் அவர்கள் தொடங்கி வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 24, 2026

கோ ஆப் டெக்ஸ் நிறுவனத்தின் 30 சதவீத தீபாவளி சிறப்பு தள்ளுபடி விற்பனையினை மாவட்ட ஆட்சித்தலைவர் அவர்கள் தொடங்கி வைத்தார்.

விருதுநகர், மேற்கு தெப்பம் சந்தை தெருவில் உள்ள கோ ஆப் டெக்ஸ் நிறுவனத்தின் 30 சதவீத தீபாவளி சிறப்பு தள்ளுபடி விற்பனையினை மாவட்ட ஆட்சித்தலைவர் திருமதி ஷரண்யா அறி I A S., அவர்கள் (23.09.2026) தொடங்கி வைத்தார்.கைத்தறி நெசவாளர் கூட்டுறவு சங்கமாக கோ ஆப் டெக்ஸ் நிறுவனம் 1935-ஆம் ஆண்டு தொடங்கப்பட்டு இந்தியாவின் மிகப்பெரிய தலைமை கைத்தறி நெசவாளர் கூட்டுறவு சங்கமாக வளர்ச்சி அடைந்துள்ளது. தமிழ்நாடு முழுவதும் உள்ள நெசவாளர் கூட்டுறவு சங்கங்களில் நெசவாளர்களால் உற்பத்தி செய்யப்படும் துணி ரகங்களை 90 ஆண்டுகளுக்கு மேலாக கோ ஆப் டெக்ஸ் என்ற வணிக முத்திரையுடன் 146 விற்பனை நிலையங்கள் மூலம் விற்பனை செய்து வருகிறது. பட்டு மற்றும் பருத்தி ரகங்களின் பாரம்பரிய மற்றும் நவீன கால வடிவமைப்புகளைக் கொண்டு சிறந்த கைத்தறி ரகங்களை வடிவமைத்து பொதுமக்களுக்கு விற்பனை செய்து வருகிறது.தீபாவளி பண்டிகை காலத்தினை முன்னிட்டு நவீன காலத்தின் தேவையினை கருத்தில் கொண்டு புதிய வடிவமைப்புகளில் பட்டு மற்றும் பருத்தி சேலைகள், பருத்தி வேட்டிகள், படுக்கை விரிப்புகள் போன்ற ஏராளமான ரகங்கள் விற்பனைக்கு வைக்கப்பட்டுள்ளன. மேலும், இளைய தலைமுறை வாடிக்கையாளர்கள் விரும்பும் வகையில் புதிய வடிவமைப்புகளில், அவரது தேவைகளை நிறைவேற்றிடும் வண்ணம் பாரம்பரிய பட்டு மற்றும் பருத்தி ரகங்களில் புதுமையான வடிவமைப்புகள் மற்றும் வண்ணங்களுடனும் பல மதிப்புக் கூட்டப்பட்ட ரகங்கள் விற்பனைக்கு வைக்கப்பட்டுள்ளது.கைத்தறி ரகங்களின் விற்பனையினை ஊக்குவிக்கும் விதமாக தமிழக அரசு இந்த ஆண்டும் தீபாவளி பண்டிகையினை முன்னிட்டு பட்டு மற்றும் பருத்தி கைத்தறி ரகங்களுக்கு 30 சதவீதம் சிறப்பு தள்ளுபடியும், விசைத்தறி ரகங்களுக்கு 20 சதவீதம் சிறப்பு தள்ளுபடியும் வழங்கியுள்ளது. அதன் பொருட்டு தீபாவளி சிறப்பு தள்ளுபடி விற்பனை இன்று துவக்கி வைக்கப்பட்டுள்ளது.விருதுநகர் மாவட்டத்திலுள்ள விருதுநகர், சிவகாசி மற்றும் ஸ்ரீவில்லிபுத்தூர் ஆகிய இடங்களில் உள்ள 3 கோ ஆப் டெக்ஸ் விற்பனை நிலையங்களுக்கு சேர்த்து ரூ.1.54 கோடி தீபாவளி விற்பனை குறியீடாக தமிழக அரசால் நிர்ணயிக்கப்பட்டுள்ளது. நடப்பாண்டில் ரூ.1.26 கோடி மதிப்பீட்டில் விற்பனை நடைபெற்றுள்ளது.கோ ஆப் டெக்ஸ் ஜவுளி ரகங்களை மின்வணிக வலைதளமான www.cooptex.gov.in என்ற இணையதளத்தின் மூலமாக கொள்முதல் செய்யலாம். கோ ஆப் டெக்ஸ்-இன் மாதாந்திர சேமிப்புத்திட்டத்திலும் சேர்ந்து வாடிக்கயாளர்கள் பயன்பெறலாம்.பொதுமக்கள், மாணவ, மாணவிகள், அரசு அலுவலர்கள் கைத்தறி தொழிலாளர்களின் வாழ்வதாரத்தினை மேம்படுத்திடும் வகையில் தீபாவளி பண்டிகைக்கு கோ ஆப் டெக்ஸ் மூலம் ஜவுளி ரகங்களை வாங்கி பயன்படுத்திட வேண்டும் என மாவட்ட ஆட்சித்தலைவர் அவர்கள் தெரிவித்தார்.நிகழ்ச்சியில் கோ ஆப் டெக்ஸ் மண்டல மேலாளர் திரு.சந்திரசேகரன், துணை மேலாளர் திருமதி தீபா, விற்பனை நிலைய மேலாளர் திருமதி கீதா உட்பட பலர் கலந்து கொண்டனர்.

கனிம வளங்கள் கொண்டு செல்லும் வாகனங்களில் GPS பொருத்தி MIMAS இணையதளத்தில் 30.09.2026-க்குள் ஒருங்கிணைக்க வேண்டும் என மாவட்ட ஆட்சித்தலைவர் அவர்கள் தகவல்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 24, 2026

கனிம வளங்கள் கொண்டு செல்லும் வாகனங்களில் GPS பொருத்தி MIMAS இணையதளத்தில் 30.09.2026-க்குள் ஒருங்கிணைக்க வேண்டும் என மாவட்ட ஆட்சித்தலைவர் அவர்கள் தகவல்.

விருதுநகர் மாவட்டத்தில் குவாரிகள், கிரஷர் மற்றும் கனிம சேமிப்புக் கிடங்குகளிலிருந்து கனிமங்களை ஏற்றிச் செல்லும் அனைத்து வாகனங்களிலும் AIS-140 தரத்திலான GPS (VLTD) கருவி பொருத்துவது கட்டாயமாகும். பொருத்தப்பட்ட GPS கருவியின் விவரங்களை MIMAS இணையதளத்தில் பதிவு செய்து ஒருங்கிணைப்பு (Integration) செய்ய வேண்டும். GPS கருவி அரசால் அங்கீகரிக்கப்பட்ட AIS-140 தரத்திலான நிறுவனங்களிடமிருந்து மட்டுமே பொருத்தப்பட வேண்டும். எனவே, குவாரி குத்தகைதாரர்கள், கிரஷர் உரிமையாளர்கள், கனிம சேமிப்புக் கிடங்கு உரிமையாளர்கள் மற்றும் சம்பந்தப்பட்ட வாகன உரிமையாளர்கள் தங்களது வாகனங்களில் GPS கருவியை பொருத்தி, MIMAS இணையதளத்தில் ஒருங்கிணைக்கும் பணியை 30.09.2026-க்குள் முடிக்குமாறு கேட்டுக்கொள்ளப்படுகிறார்கள். 30.09.2026-க்கு பின்னர், AIS-140; GPS பொருத்தப்பட்டு MIMAS இணையதளத்தில் ஒருங்கிணைக்கப்பட்ட வாகனங்களுக்கு மட்டுமே கனிமப் போக்குவரத்திற்கான நடைச்சீட்டு / அனுமதிச்சீட்டு வழங்கப்படும். எனவே, தொடர்புடைய அனைவரும் காலதாமதமின்றி உரிய நடவடிக்கை மேற்கொண்டு , நிர்ணயிக்கப்பட்ட காலக்கெடுவிற்குள் GPS பொருத்துதல் மற்றும் MIMAS ஒருங்கிணைப்பு பணிகளை நிறைவு செய்ய வேண்டும் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

பிற்படுத்தப்பட்ட, மிகப்பிற்படுத்தப்பட்ட மற்றும் சீர்மரபினர் மாணவ/மாணவியருக்கு 2026-2027 ஆம் ஆண்டிற்கான பிரதம மந்திரி பள்ளி மேற்படிப்பு கல்வி உதவித்தொகையை பெற விண்ணப்பிக்கலாம்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 24, 2026

பிற்படுத்தப்பட்ட, மிகப்பிற்படுத்தப்பட்ட மற்றும் சீர்மரபினர் மாணவ/மாணவியருக்கு 2026-2027 ஆம் ஆண்டிற்கான பிரதம மந்திரி பள்ளி மேற்படிப்பு கல்வி உதவித்தொகையை பெற விண்ணப்பிக்கலாம்.

அரசு, அரசு உதவி பெறும் கல்வி நிறுவனங்கள் மற்றும் தனியார் தொழிற்கல்லூரிகளில் அரசு ஒதுக்கீட்டின் கீழ் பயிலும் பிற்படுத்தப்பட்ட (பி.வ), மிகப்பிற்படுத்தப்பட்ட (மி.பி.வ) (ம) சீர்மரபினர் (சீ.ம) மாணவ/மாணவியருக்கு 2026-2027 ஆம் ஆண்டிற்கான பிரதம மந்திரி பள்ளி மேற்படிப்பு கல்வி உதவித்தொகை திட்டம் (PM YASASVI Postmatric Scholarship Scheme) கீழ்க்கண்ட நிபந்தனைகளின் அடிப்படையில் பிற்படுத்தப்பட்டோர், மிகப்பிற்படுத்தப்பட்டோர் (ம) சிறுபான்மையினர் நலத்துறை மூலம் வருடந்தோறும் செயல்படுத்தப்பட்டு வருகின்றன. அரசு மற்றும் அரசு உதவி பெறும் கலை மற்றும் அறிவியல் கல்லூரிகளில் மூன்று வருடங்கள் உள்ள இளங்கலை பட்டப்படிப்பு பயிலும் பி.வ/மி.ப.வ/சீ.ம மாணவ/ மாணவியருக்கு எவ்வித நிபந்தனையுமின்றி கல்வி உதவித்தொகை வழங்கப்பட்டு வருகிறது.இத்திட்டத்திற்கு விண்ணணப்பிப்பதற்கு பாலிடெக்னிக், இளங்கலை (தொழிற்படிப்பு), முதுகலை (ம) ஆராய்ச்சி படிப்புகள் பயிலும் மாணாக்கர்களின் குடும்ப ஆண்டு வருமானம் ரூ.2,50,000/-க்கு மிகாமல் இருத்தல் வேண்டும். 2026-27 ஆம் கல்வியாண்டில் மேற்படி கல்வி உதவித்தொகைத் திட்டத்திற்கான விண்ணப்பங்கள் University Management Information System (UMIS) https://umis.tn.gov.in/ என்ற இணையதளம் மூலம் பெறப்படுகிறது.தகுதியுள்ள மாணக்கர்கள் தாங்கள் பயிலும் கல்லூரியில் கல்வி உதவித் தொகைக்கென உள்ள ஒருங்கிணைப்பு அலுவலரை (Nodal Officer) அணுகி, https://umis.tn.gov.in/ என்ற இணையதளத்தின் மூலம் 18.09.2026 முதல் 21.10.2026 வரை கல்வி உதவித் தொகைக்கு விண்ணப்பிக்கலாம். கல்வி உதவித்தொகை தொடர்பான சந்தேகங்களுக்கு மாவட்ட ஆட்சியர் அலுவலக வளாகத்தில் உள்ள மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலரை, அலுவலக நேரங்களில் அணுகி விவரங்களை பெற்றுக் கொள்ளலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

மாற்றுத்திறனாளி திரு.குமார் என்பவர் விடுத்த கோரிக்கையை ஏற்று காய்கறி கடையினை திறந்து வைத்து முதல் விற்பனையினை அமைச்சர் அவர்கள்தொடங்கி வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 23, 2026

மாற்றுத்திறனாளி திரு.குமார் என்பவர் விடுத்த கோரிக்கையை ஏற்று காய்கறி கடையினை திறந்து வைத்து முதல் விற்பனையினை அமைச்சர் அவர்கள்தொடங்கி வைத்தார்.

தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் விருதுநகர் மாவட்டம், சிவகாசி சாட்சியாபுரத்தில் மாற்றுத்திறனாளி திரு.குமார் என்பவர் சுயதொழில் தொடங்குவதற்காக முன்வைத்த கோரிக்கையை ஏற்று, அவருக்கு வாழ்வாதாரம் ஏற்படுத்தும் வகையில் காய்கறி கடையினை மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் (22.09.2026) திறந்து வைத்து, விற்பனையை தொடங்கி வைத்தார்.தமிழ்நாடு அரசு அனைத்து தரப்பு மக்களின் நலனையும் கருத்தில் கொண்டு பல்வேறு நலத்திட்டங்களை செயல்படுத்தி வருகிறது. குறிப்பாக, மாற்றுத்திறனாளிகள் சமூகத்தில் சுயமரியாதையுடனும், தன்னம்பிக்கையுடனும் வாழ்வதற்கு தேவையான வாழ்வாதார மற்றும் சுயதொழில் வாய்ப்புகளை ஏற்படுத்துவதில் அரசு சிறப்பு கவனம் செலுத்தி வருகிறது.மாற்றுத்திறனாளிகள் தங்களது திறமை மற்றும் விருப்பத்திற்கு ஏற்ப சுயதொழில் தொடங்கி, பொருளாதார ரீதியாக தன்னிறைவை அடைவதற்கு அரசு சார்பில் பல்வேறு உதவிகள் வழங்கப்பட்டு வருகின்றன. அந்த வகையில், சிவகாசி சாட்சியாபுரத்தைச் சேர்ந்த மாற்றுத்திறனாளி திரு.குமார் என்பவர் சமூக வலைதளத்தின் வாயிலாக,”தனக்கு விபத்து ஏற்பட்டதால் நடமாட முடியாமல் இருக்கும் சூழ்நிலையிலும், அவரது மனைவியும் மாற்றுத்திறனாளியாக இருப்பதால் வெளியே சென்று வருமானம் ஈட்ட முடியாத சூழ்நிலையில் உள்ளனர். இதன் காரணமாக சாலை ஓரத்தில் திறந்த வெளியில் காய்கறி கடை வைத்துள்ளோம். திறந்த வெளி கடையாக இருப்பதால் மீதமுள்ள காய்கறிகளை வீட்டுக்கு கொண்டு செல்ல இயலாததால், பொருட்களை ஓரத்தில் கட்டி வைத்து செல்வோம். அதற்கும் கூட மற்றொருவரின் உதவி தேவைப்படுகிறது. அவ்வாறு வைத்துச் செல்லும் பொருட்கள் இரவு நேரங்களில் காணாமல் போய்விடுகிறது. இதன் காரணமாக எனது முதலீடும், வருமானமும் பாதிக்கப்படுகிறது. எனவே, எங்களது வாழ்வாதாரத்திற்கும், இந்த காய்கறி பொருட்களை பாதுகாப்பாக வைக்கவும், பெட்டிக்கடை வைத்துத்தர தமிழக அரசுக்கு கோரிக்கை வைத்தார்.“ அதனடிப்படையில் அவரது கோரிக்கையை ஏற்று, சமூக பங்களிப்பு நிதியின் மூலம் அவருக்கு வாழ்வாதாரம் ஏற்படுத்திடும் வகையில் காய்கறி கடை அமைக்கப்பட்டு, இன்று திறந்து வைத்து காய்கறிகளை வாங்கி முதல் விற்பனை தொடங்கி வைக்கப்பட்டுள்ளது.இந்த காய்கறி கடையின் மூலம் மாற்றுத்திறனாளி தனது சொந்த உழைப்பின் மூலம் வருவாய் ஈட்டி, குடும்பத்தின் வாழ்வாதாரத்தை மேம்படுத்திக் கொள்ள முடியும்.இதுபோன்று மாற்றுத்திறனாளிகளிடமிருந்து பெறப்படும் கோரிக்கைகள் மீது உரிய நடவடிக்கை மேற்கொண்டு, அவர்களின் வாழ்வாதாரத்தை மேம்படுத்துவதற்கான நடவடிக்கைகள் தொடர்ந்து மேற்கொள்ளப்படும் என மாண்புமிகு தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.இந்நிகழ்வின் போது, சிவகாசி சார் ஆட்சியர் திரு.முகமது இர்பான் I A S., மாவட்ட மாற்றுத்திறனாளிகள் நல அலுவலர் திரு.பிரம்ம நாயகம், அரசு அலுவலர்கள் மற்றும் பொதுமக்கள் கலந்து கொண்டனர்.

அமைச்சர் அவர்கள் ரூ.54.23 இலட்சம் மதிப்பிலான புதிய கட்டடங்களை பொதுமக்கள் பயன்பாட்டிற்கு திறந்து வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 23, 2026

அமைச்சர் அவர்கள் ரூ.54.23 இலட்சம் மதிப்பிலான புதிய கட்டடங்களை பொதுமக்கள் பயன்பாட்டிற்கு திறந்து வைத்தார்.

விருதுநகர் மாவட்டம், சிவகாசி ஊராட்சி ஒன்றியம், நடுவப்பட்டி ஊராட்சியில் ரூ.20 இலட்சம் மதிப்பில் கட்டப்பட்டுள்ள அங்கன்வாடி மையக் கட்டடத்தையும், நிறைமதி ஊராட்சி ஒன்றிய தொடக்கப்பள்ளியில் ரூ.34.23 இலட்சம் மதிப்பில் கட்டப்பட்டுள்ள புதிய வகுப்பறைக் கட்டடங்களையும் தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் (22.09.2026) பொதுமக்கள் மற்றும் மாணவ, மாணவியர்களின் பயன்பாட்டிற்காக திறந்து வைத்தார்.தமிழ்நாடு அரசு குழந்தைகளின் நலன், ஊட்டச்சத்து மற்றும் கல்வி வளர்ச்சிக்கு மிகுந்த முக்கியத்துவம் அளித்து பல்வேறு திட்டங்களை செயல்படுத்தி வருகிறது. குறிப்பாக, கிராமப்புறங்களில் உள்ள அங்கன்வாடி மையங்கள் மற்றும் அரசு பள்ளிகளில் தேவையான அடிப்படை கட்டமைப்பு வசதிகளை ஏற்படுத்தி, குழந்தைகள் மற்றும் மாணவ, மாணவியர்களுக்கு பாதுகாப்பான மற்றும் சிறந்த கற்றல் சூழலை உருவாக்க தொடர்ந்து நடவடிக்கைகள் மேற்கொள்ளப்பட்டு வருகின்றன.அதன் அடிப்படையில், சிவகாசி ஊராட்சி ஒன்றியம், நடுவப்பட்டி ஊராட்சியில் ரூ.20 இலட்சம் மதிப்பில் கட்டப்பட்டுள்ள புதிய அங்கன்வாடி மையக் கட்டடம் இன்று பொதுமக்கள் பயன்பாட்டிற்கு திறந்து வைக்கப்பட்டுள்ளது. இம்மையத்தின் மூலம் அப்பகுதியில் உள்ள குழந்தைகளுக்கு தேவையான முன்பருவக் கல்வி, ஊட்டச்சத்து மற்றும் அடிப்படை பராமரிப்பு வசதிகள் சிறப்பாக கிடைக்க வழிவகை செய்யப்பட்டுள்ளது.மேலும், நிறைமதி ஊராட்சி ஒன்றிய தொடக்கப்பள்ளியில் ரூ.34.23 இலட்சம் மதிப்பில் கட்டப்பட்டுள்ள புதிய வகுப்பறைக் கட்டடங்கள் திறந்து வைக்கப்பட்டுள்ளன. இதன் மூலம் பள்ளி மாணவ, மாணவியர்களுக்கு கூடுதல் வகுப்பறை வசதிகள் கிடைப்பதுடன், கல்வி கற்க ஏதுவான சிறந்த சூழல் உருவாகியுள்ளது.தமிழ்நாடு அரசு அரசுப் பள்ளிகளில் பயிலும் மாணவ, மாணவியர்களுக்கு தரமான கல்வியை வழங்குவதுடன், அவர்களுக்கு தேவையான அனைத்து அடிப்படை கட்டமைப்பு வசதிகளையும் தொடர்ந்து மேம்படுத்தி வருகிறது. அதேபோன்று, குழந்தைகளின் ஆரம்பகால வளர்ச்சிக்கு முக்கிய பங்காற்றும் அங்கன்வாடி மையங்களிலும் தேவையான கட்டமைப்பு வசதிகள் ஏற்படுத்தப்பட்டு வருகின்றன.புதிதாக திறந்து வைக்கப்பட்டுள்ள கட்டடங்களை பொதுமக்கள், பள்ளி ஆசிரியர்கள் மற்றும் மாணவ, மாணவியர்கள் முறையாக பயன்படுத்திக் கொண்டு, அவற்றை தூய்மையாகவும் பாதுகாப்பாகவும் பராமரிக்க வேண்டும். அரசின் திட்டங்கள் மற்றும் நலத்திட்டங்கள் தகுதியான பயனாளிகளுக்கு முழுமையாக சென்றடைய அனைவரும் ஒருங்கிணைந்து செயல்பட வேண்டும் என தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.இந்நிகழ்ச்சியில் மாவட்ட வருவாய் அலுவலர் திருமதி ஆனந்தி, திட்ட இயக்குநர் (மாவட்ட ஊராட்சி வளர்ச்சி முகமை) திருமதி வானதி, சிவகாசி சார் ஆட்சியர் திரு.முகமது இர்பான் I A S., முதன்மை கல்வி அலுவலர் திரு.அரவிந்தன், திட்ட இயக்குநர் (ஒருங்கிணைந்த குழந்தை வளர்ச்சி பணிகள் திட்டம்) திருமதி ஷீலா சுந்தரி, அரசு அலுவலர்கள், உள்ளாட்சி பிரதிநிதிகள், பள்ளி ஆசிரியர்கள், மாணவ, மாணவியர்கள், அங்கன்வாடி பணியாளர்கள் மற்றும் பொதுமக்கள் கலந்து கொண்டனர்.

அமைச்சர் அவர்கள் மக்கள் தொடர்பு திட்ட முகாமில் 277 பயனாளிகளுக்கு ரூ.24.65 இலட்சம் மதிப்பிலான பல்வேறு நலத்திட்ட உதவிகளை வழங்கினார்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 23, 2026

அமைச்சர் அவர்கள் மக்கள் தொடர்பு திட்ட முகாமில் 277 பயனாளிகளுக்கு ரூ.24.65 இலட்சம் மதிப்பிலான பல்வேறு நலத்திட்ட உதவிகளை வழங்கினார்.

தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் விருதுநகர் மாவட்டம், சிவகாசி வட்டம் நாரணாபுரம் ஊராட்சியில் (22.09.2026) மக்கள் தொடர்பு திட்ட முகாமில்மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் 277 பயனாளிகளுக்கு ரூ.24.65 இலட்சம் மதிப்பிலான பல்வேறு நலத்திட்ட உதவிகளை வழங்கினார்.பொதுமக்கள் அரசு அலுவலகங்களை தேடி வந்து தங்களது தேவைகளையும், கோரிக்கைகளையும் தெரிவிக்கும் போது ஏற்படும் காலதாமதத்தையும், நேர விரையத்தையும் பொருளாதார இழப்புகளையும் தடுக்கும் வகையில் அனைத்து துறை அலுவலர்களும் ஒவ்வொரு மாதமும் ஒரு வட்டத்தினை தேர்ந்தெடுத்து அதன் வருவாய் கிராமத்தில் மக்கள் தொடர்பு முகாம் நடத்தப்படுகிறது. இதன் மூலம் தமிழக அரசால் செயல்படுத்தப்படும் திட்டங்களின் பயன்களை பொதுமக்கள் அறிந்து கொள்ளவும், அதன் மூலம் தங்களுக்கு தேவையான நலத் திட்டங்களை பெற்றிடவும் வழிவகை ஏற்படுத்தப்பட்டுள்ளது. தமிழ்நாடு முதலமைச்சர் அவர்கள் தலைமையிலான தமிழக அரசால் செயல்படுத்தப்பட்டு வரும் எண்ணற்றத் திட்டங்கள் மூலம் நமது மாவட்டத்திலும் பல்வேறு தரப்பினர் பயன் பெற்று வருகின்றனர். தமிழ்நாடு முதலமைச்சர் அவர்கள் பெண்கள் மற்றும் குழந்தைகளின் பாதுகாப்பை முக்கிய நோக்கமாகக் கொண்டு திட்டங்களை செயல்படுத்தி வருகிறார்கள். பெண்கள் பணிபுரிவோராக மட்டுமல்லாது தொழில் முனைவோராக உருவாக வேண்டும். அதற்கு அரசு சார்பில் பல்வேறு திட்டங்கள் மற்றும் மானியங்கள் வழங்கப்பட்டு வருகின்றன. அதனை அறிந்து கொண்டு பெண்கள் பயன்படுத்திக் கொள்ள வேண்டும். மாவட்டத்தில் படித்த இளைஞர்களுக்கு வேலைவாய்ப்பினை வழங்கும் வகையில் 2 மாபெரும் தனியார் வேலை வாய்ப்பு முகாம்கள் நடத்தப்பட்டது. அதன் மூலம் வேலைவாய்ப்பினை பெற்ற இளைஞர்கள் பல்வேறு தொழில் நிறுவனங்களில் தற்போது பணிபுரிந்து வருகின்றனர்.இன்று நடைபெற்ற மக்கள் தொடர்பு திட்ட முகாம் மூலம் 73 பயனாளிகளுக்கு ரூ.15.72 இலட்சம் மதிப்பில் இலவச வீட்டுமனை பட்டாக்கள், 153 பயனாளிகளுக்கு மின்னணு குடும்ப அட்டைகள், 1 பயனாளிக்கு ரூ.5,782 மதிப்பில் இலவச தேய்ப்பு பெட்டி, 10 கர்ப்பிணி பெண்களுக்கு ரூ.20,000 மதிப்பில் ஊட்டச்சத்து பெட்டகம், வேளாண்மைத்துறை மூலம் 3 பயனாளிகளுக்கு ரூ.41,351 மதிப்பில் செயல் விளக்கத்திடல், நுண்ணீர் பாசன அமைத்தல், தோட்டக்கலைத் துறை மூலம் 2 பயனாளிகளுக்கு ரூ.67,550 மதிப்பில் பப்பாளி பரப்பு விரிவாக்கம், தண்ணீர் பாசனம், 12 பயனாளிகளுக்கு முதலமைச்சரின் விரிவான காப்பீடு அட்டைகள், கால்நடைத்துறை மூலம் 5 பயனாளிகளுக்கு ரூ.2500 மதிப்பில் புல்கரனை மற்றும் தாது உப்பு கலவை, மாற்றுத்திறனாளிகள் நலத்துறை மூலம் 10 பயனாளிகளுக்கு ரூ.3.99 இலட்சம் மதிப்பில் செயற்கை கால், மின்கல சக்கர நாற்காலி, மூன்று சக்கர மிதி வண்டிகள், காதொலி கருவிகள், மீன் வளத்துறை மூலம் ரூ.6500 மதிப்பில் இருசக்கர வாகனத்துடன் கூடிய குளிர் பதனப்பெட்டி, தாட்கோ மூலம் 7 பயனாளிகளுக்கு ரூ.3.50 இலட்சம் மதிப்பில் கடனுதவிக்கான மானியங்கள் என மொத்தம் 277 பயனாளிகளுக்கு ரூ.24.65 இலட்சம் மதிப்பிலான நலத்திட்ட உதவிகள் வழங்கப்பட்டுள்ளன.இதுபோன்று ஒவ்வொரு மாதமும் ஒரு வட்டத்தில் உள்ள ஊராட்சியில் மக்கள் தொடர்பு திட்ட முகாம் நடைபெறும். எனவே இந்த முகாம்களை பொதுமக்கள் நல்ல முறையில் பயன்படுத்திக் கொள்ள வேண்டும் என அமைச்சர் அவர்கள் தெரிவித்தார். முன்னதாக இந்த மக்கள் தொடர்பு திட்ட முகாமில் பல்வேறு அரசு துறைகள் மூலமாக அமைக்கப்பட்ட அரசு திட்டங்கள் சார்ந்த அரங்குகளை தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் பார்வையிட்டார்.இந்நிகழ்ச்சியில், மாவட்ட வருவாய் அலுவலர் திருமதி ஆனந்தி, சிவகாசி சார் ஆட்சியர் திரு.முகமது இர்பான் I A S., வேளாண்மை இணை இயக்குநர் திரு.மோகன்தாஸ் சௌமியன், தனித்துணை ஆட்சியர் (சமூக பாதுகாப்புத் திட்டம்) திருமதி கு.மோகனா, மாற்றுத்திறனாளிகள் நலத்துறை அலுவலர் திரு.பிரம்ம நாயகம், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் திரு ஜான்சன் தேவசகாயம், தோட்டக்கலைத்துறை துணை இயக்குநர் திரு.ஆறுமுகம், தாட்கோ மேலாளர் திருமதி இந்திரா காந்தி, சிவகாசி வட்டாட்சியர் பொதுமக்கள் உட்பட பலர் கலந்து கொண்டனர்.

பெருந்தலைவர் காமராஜர் காலை உணவுத்திட்ட விரிவாக்கத்தினை அமைச்சர் அவர்கள் 1,23,480 மாணவர்களுக்கு பயன்பெறும் வகையில் தொடங்கி வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Sep 23, 2026

பெருந்தலைவர் காமராஜர் காலை உணவுத்திட்ட விரிவாக்கத்தினை அமைச்சர் அவர்கள் 1,23,480 மாணவர்களுக்கு பயன்பெறும் வகையில் தொடங்கி வைத்தார்.

பெருந்தலைவர் காமராஜர் காலை உணவுத்திட்ட விரிவாக்கத்தினை தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள், மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் 1,23,480 மாணவர்களுக்கு பயன்பெறும் வகையில்(22.09.2026) தொடங்கி வைத்தார்.தமிழக மாணவர்களின் எதிர்கால நலன் கருதியும், அனைத்து மாணவர்களுக்கும் சிறந்த கல்வியினை வழங்கிட வேண்டும் என்பதற்காகவும், பள்ளி மாணவர்களின் ஊட்டச்சத்து நிலையினை மேம்படுத்தி பசியின்றி அனைவரும் பள்ளிக்கு வருவதனை உறுதி செய்திடும் வகையில் பெருந்தலைவர் காமராஜர் காலை உணவுத்திட்டம் செயல்படுத்தப்பட்டு வருகிறது.இத்திட்டத்தினை மேம்படுத்தி அரசு மற்றும் அரசு உதவிபெறும் பள்ளிகளில் 6 முதல் 8ஆம் வகுப்பு வரை பயிலும் மாணவ, மாணவிகளுக்கும் காலை உணவு வழங்கிடும் வகையில் பெருந்தலைவர் காமராஜர் காலை உணவுத்திட்ட விரிவாக்கம் செயல்படுத்திட தமிழ்நாடு முதலமைச்சர் உத்தரவிட்டுள்ளார். இதன் மூலம் தமிழகம் முழுவதும் 15.30 இலட்சம் மாணவ, மாணவியர்கள் கூடுதலாக பயன் பெறவுள்ளார்கள்.அதனடிப்படையில் விருதுநகர் மாவட்டத்தில் 1,200 அரசு மற்றும் அரசு உதவி பெறும் பள்ளிகளைச் சேர்ந்த 69,333 மாணவர்கள் ஏற்கெனவே பயன்பெற்று வந்த நிலையில் தற்போது விரிவாக்கத்தின் மூலம் 485 பள்ளிகளைச் சேர்ந்த 54,147 மாணவ, மாணவிகள் என மொத்தம் 1,685 பள்ளிகளைச் சேர்ந்த 1,23,480 மாணவ, மாணவிகள் பயன் பெறுவார்கள்.இதன் மூலம் எதிர்கால சமூகமான இளைஞர்கள் நல்ல கல்வி அறிவுடனும், சிறந்த சுகாதாரத்துடனும் உருவாக வழிவகை செய்யப்பட்டுள்ளது. மாணவ, மாணவிகள் இதனை நல்ல முறையில் பயன்படுத்தி தங்களது வாழ்வினை மேம்படுத்திக் கொள்ள வேண்டும் என தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.நிகழ்ச்சியில் சிவகாசி சார் ஆட்சியர் திரு.முகமது இர்பான்I A S., சிவகாசி மாநகராட்சி ஆணையாளர் திரு.கண்ணன், முதன்மை கல்வி அலுவலர் திரு.அரவிந்தன், தமிழ்நாடு மாநில ஊரக வாழ்வாதார திட்ட இயக்குநர் திரு.இலக்குவன் உட்பட பலர் கலந்து கொண்டனர்

மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் அவர்கள் தலைமையில் நடைபெற்றது.

செய்தி மக்கள் தொடர்பு அலுவலகம் விருதுநகர் மாவட்டம்

Sep 22, 2026

மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் அவர்கள் தலைமையில் நடைபெற்றது.

விருதுநகர் மாவட்ட ஆட்சியர் அலுவலகக் கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் (21.09.2026) நடைபெற்றது.இக்கூட்டத்தில், பொதுமக்கள் மற்றும் மாற்றுத்திறனாளிகளிடமிருந்து இலவச வீட்டுமனைப்பட்டா, பட்டா மாறுதல், புதிய குடும்ப அட்டை, வேலைவாய்ப்பு, விபத்து நிவாரணம், மாற்றுத்திறனாளிகள் மற்றும் நலிந்தோர் நல உதவித்திட்டங்கள், விதவை உதவித்தொகை, திருமண உதவித்தொகை மற்றும் முதியோர் உதவித்தொகை உள்ளிட்ட பல்வேறு கோரிக்கைகள் குறித்தான மனுக்கள் பெறப்பட்டன.மேலும், மாவட்ட ஆட்சித்தலைவர் அவர்கள் மாற்றுத்திறனாளிகள் மற்றும் மூத்த குடிமக்களுக்காக அமைக்கப்பட்டுள்ள சிறப்பு அமருமிடத்திற்கு நேரடியாகச் சென்று, அவர்களின் கோரிக்கை மனுக்களைப் பெற்று பரிசீலித்தார். பொதுமக்களிடமிருந்து பெறப்பட்ட இம்மனுக்கள் அனைத்தையும் சம்பந்தப்பட்ட துறை அலுவலர்களிடம் ஒப்படைத்து, அவற்றின் மீது உரிய மற்றும் விரைவான நடவடிக்கை எடுக்கவும், முதலமைச்சரின் தனிப்பிரிவு மனுக்கள் மீது கூடுதல் கவனம் செலுத்தி விரைந்து தீர்வு காணவேண்டும் என உத்தரவிட்டார்.இக்கூட்டத்தில், ஆதிதிராவிடர் நலத்துறை சார்பில் வன்கொடுமை தடுப்பு சட்டத்தின் கீழ் மரணமடைந்தவரின் வாரிசு தாரருக்கு மாதாந்திர ஓய்வூதியம் ரூ.5000/- மற்றும் அகவிலைப்படி வழங்கும் ஆணையினையும், பிற்படுத்தப்பட்டோர் மற்றும் சிறுபான்மையினர் நலத்துறை சார்பில் சிறு, குறு விவசாயிகள் நீர்பாசனம் திட்டத்தின் கீழ் 50% அரசு மானியத்தொகை ரூ.50,000/- 1 பயனாளிக்கும் மாவட்ட ஆட்சித்தலைவர் அவர்கள் வழங்கினார். தொடர்ந்து, பொதுமக்களிடமிருந்து 1,068 மனுக்கள் பெறப்பட்டன. இம்மனுக்கள் சம்மந்தப்பட்ட துறை அலுவலர்களிடம் உரிய நடவடிக்கை எடுக்க ஒப்படைக்கப்பட்டது.இக்கூட்டத்தில், மாவட்ட வருவாய் அலுவலர் திருமதி ரா.ஆனந்தி, மாவட்ட ஆட்சியரின் நேர்முக உதவியாளர் (நிலம்) திரு.சையது முகமது, தனித்துணை ஆட்சியர் (ச.பா.தி) திருமதி மோகனா, மாவட்ட வழங்கல் அலுவலர் திரு.அமர்நாத், ஆதி திராவிடர் நலத்துறை அலுவலர் திருமதி சாந்தி, மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் திரு.ஜான்சன் தேவசகாயம், பொது மேலாளர் (தாட்கோ) திருமதி இந்திராகாந்தி, அரசுத் துறை அலுவலர்கள் மற்றும் பொதுமக்கள் உட்பட பலர் கலந்து கொண்டனர்.

விவசாயிகள் குறைதீர்க்கும் நாள் கூட்டம் 25.09.2026 அன்று நடைபெறவுள்ளது.

செய்தி மக்கள் தொடர்பு அலுவலகம் விருதுநகர் மாவட்டம்

Sep 22, 2026

விவசாயிகள் குறைதீர்க்கும் நாள் கூட்டம் 25.09.2026 அன்று நடைபெறவுள்ளது.

விருதுநகர் மாவட்டத்தில் செப்டம்பர்-2026 மாதத்திற்கான விவசாயிகள் குறை தீர்க்கும் நாள் கூட்டம் 25.09.2026 அன்று காலை 11.00 மணியளவில் விருதுநகர் புதிய மாவட்ட ஆட்சியர் அலுவலக மக்கள் கூட்ட அரங்கில் மாவட்ட ஆட்சித்தலைவர் திருமதி ஷரண்யா அறி I A S., அவர்களின் தலைமையில் நடைபெறவுள்ளது.மேற்படி கூட்டத்தில் விவசாய பெருமக்கள் கலந்து கொள்வதுடன் விவசாயம் தொடர்பான பொதுவான கோரிக்கைகளை மட்டும் மனு மூலம் அளிக்கலாம். விவசாயிகள் வட்டாரத்திற்கு இருவர் வாரியாக பொதுவான கோரிக்கைகள் மட்டும் விவாதிக்கவும், சிறந்த முறையில் விவசாயிகள் குறை தீர்க்கும் நாள் கூட்டத்தினை நடத்திட முழு ஒத்துழைப்பு தருமாறு மாவட்ட ஆட்சித்தலைவர் அவர்கள் தெரவித்துள்ளார்.