25 YEARS OF EXCELLENCE
Weather: -
Saturday Oct 24, 2026
11:54:19am
Weather: -
Saturday Oct 24, 2026
11:54:19am
விருதுநகர் மாவட்ட ஆட்சியர் அலுவலகக் கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் திருமதி ஷரண்யா அறி I A S ., அவர்கள் தலைமையில் (28.09.2026) நடைபெற்றது.இக்கூட்டத்தில், பொதுமக்கள் மற்றும் மாற்றுத்திறனாளிகளிடமிருந்து இலவச வீட்டுமனைப்பட்டா, பட்டா மாறுதல், புதிய குடும்ப அட்டை, வேலைவாய்ப்பு, விபத்து நிவாரணம், மாற்றுத்திறனாளிகள் மற்றும் நலிந்தோர் நல உதவித்திட்டங்கள், விதவை உதவித்தொகை, திருமண உதவித்தொகை மற்றும் முதியோர் உதவித்தொகை உள்ளிட்ட பல்வேறு கோரிக்கைகள் குறித்தான மனுக்கள் பெறப்பட்டன.மேலும், மாவட்ட ஆட்சித்தலைவர் அவர்கள் மாற்றுத்திறனாளிகள் மற்றும் மூத்த குடிமக்களுக்காக அமைக்கப்பட்டுள்ள சிறப்பு அமருமிடத்திற்கு நேரடியாகச் சென்று, அவர்களின் கோரிக்கை மனுக்களைப் பெற்று பரிசீலித்தார். பொதுமக்களிடமிருந்து பெறப்பட்ட இம்மனுக்கள் அனைத்தையும் சம்பந்தப்பட்ட துறை அலுவலர்களிடம் ஒப்படைத்து, அவற்றின் மீது உரிய மற்றும் விரைவான நடவடிக்கை எடுக்கவும், முதலமைச்சரின் தனிப்பிரிவு மனுக்கள் மீது கூடுதல் கவனம் செலுத்தி விரைந்து தீர்வு காணவேண்டும் என உத்தரவிட்டார்.இக்கூட்டத்தில், மாற்றுத்திறனாளிகள் நலத்துறை சார்பில் 4 மாற்றுத்திறனாளிகளுக்கு ரூ.2,53,000 மதிப்பிலான நவீன செயற்கை கால், பேட்டரி, ஸ்கூட்டர், கை தாங்கிகளை மாவட்ட ஆட்சித்தலைவர் அவர்கள் வழங்கினார். தொடர்ந்து, பொதுமக்களிடமிருந்து 715 மனுக்கள் பெறப்பட்டன. இம்மனுக்கள் சம்மந்தப்பட்ட துறை அலுவலர்களிடம் உரிய நடவடிக்கை எடுக்க ஒப்படைக்கப்பட்டது.இக்கூட்டத்தில், மாவட்ட வருவாய் அலுவலர் திருமதி ரா.ஆனந்தி, மாவட்ட ஆட்சியரின் நேர்முக உதவியாளர் (நிலம்) திரு.சையது முகமது, தனித்துணை ஆட்சியர் (ச.பா.தி) திருமதி மோகனா, மாவட்ட வழங்கல் அலுவலர் திரு.அமர்நாத், மாற்றுத்திறனாளிகள் நலத்துறை அலுவலர் திரு.பிரம்ம நாயகம், அரசுத் துறை அலுவலர்கள் மற்றும் பொதுமக்கள் உட்பட பலர் கலந்து கொண்டனர்.
விருதுநகர் மாவட்டத்தில் ஏறத்தாழ 35000 ஹெக்டேர் பரப்பில் மக்காச்சோளம் மானாவாரியாக பயிரிடப்படுகிறது. மக்காச்சோளம் பயிரிடும் விவசாயிகளை ஊக்குவிக்கும் வகையில் தேசிய வேளாண்மை வளர்ச்சித் திட்டம் (மக்காச்சோளம்) மற்றும் தேசிய உணவு பாதுகாப்பு மற்றும் ஊட்டச்சத்து இயக்கம் (மக்காச்சோளம்) ஆகிய திட்டங்கள் மூலம் செயல்விளக்கத்திடல்கள் 1740 ஹெக்டேர் அமைப்பதற்கு ரூ.197.7 லட்சம் மற்றும் பொது விநியோகம் திட்டத்தின் கீழ் இடுபொருள்களை விநியோகம் செய்ய ரூ.124.282 லட்சம் நிதி ஒதுக்கீடு பெறப்பெற்றுள்ளது.மக்காச்சோள செயல்விளக்கத்திடல் அமைத்திட ஒரு ஹெக்டேருக்கு மக்காச்சோள விதை 15 கிலோ, நுண்ணூட்டக் கலவை 12.5 கிலோ, திரவ உயிர் உரம் 1 லிட்டர், பயிர் வளர்ச்சி ஊக்கி 15 கிலோ மற்றும் உயிரியல் பூச்சிக் கொல்லி 4 கிலோ உள்ளடங்கிய இடுபொருட்கள் அதிகபட்சம் ஹெக்டேருக்கு ரூ.11500 மானியத்தில் வழங்கப்படும். 1 நபர் அதிகபட்சம் 2 ஹெக்டர் வரை செயல்விளக்கத்திடல் அமைக்கலாம்.பொதுவிநியோக திட்டத்தின் கீழ் மக்காச்சோள விதைகள் ஒரு ஹெக்டேருக்கு 15 கிலோ வீதம், கிலோவிற்கு 100 ரூபாய் மானியத்தில் 15 கிலோவிற்கு ரூ.1500 மானியம் வழங்கப்படுகிறது. மேலும், 50 சதவீத மானியத்தில் ஒரு ஹெக்டேருக்கு நுண்ணூட்டக் கலவை 12.5 கிலோ, திரவ உயிர் உரம் 1 லிட்டர் மற்றும் உயிரியல் பூச்சிக்கொல்லி 4 கிலோ இடுபொருட்களும் வழங்கப்படும்.மேற்படி, திட்டங்களுக்கான மக்காச்சோள விதைகள் மற்றும் இடுபொருட்கள் வட்டார வேளாண் விரிவாக்க மையம் மற்றும் துணை வேளாண்மை விரிவாக்க மையங்களில் இருப்பு வைக்கப்பட்டுள்ளது. தேவைப்படும் விவசாயிகள் தங்களது ஆதார் நகல், சிட்டா நகல் மற்றும் தேவையான ஆவணங்களுடன் அருகிலுள்ள வேளாண்மை விரிவாக்க அலுவலகத்தை அணுகி திட்டப்பலன்களை பெற்றுக்கொள்ள கேட்டுக்கொள்ளப்படுகிறது.மேலும், மக்காச்சோள சாகுபடியில் அதிக மகசூல் பெற பரிந்துரைக்கப்பட்ட சாகுபடி தொழில்நுட்பங்கள், உர மேலாண்மை, பூச்சி மற்றும் நோய் மேலாண்மை முறைகளைப் பின்பற்றுமாறும், இந்த வாய்ப்பினை பயன்படுத்தி தரமான மக்காச்சோள விதைகள் மற்றும் இடுபொருட்களைப் பெற்று அனைத்து வட்டார விவசாயிகளும் பயனடையலாம் என மாவட்ட ஆட்சித்தலைவர் திருமதி.ஷரண்யா அறி I A S., அவர்கள் தெரிவித்துள்ளார்.
பருத்தி உற்பத்தி திறன் இயக்க திட்டமானது, பருத்தியின் விளைச்சலை அதிகரிக்கவும், தரத்தை உயர்த்தவும் மற்றும் விவசாயிகளுக்கு நவீன தொழில்நுட்ப உதவிகளை வழங்கவும் இந்திய அரசாங்கத்தால் கொண்டுவரப்பட்ட ஒரு சிறப்பு திட்டமாகும்.இத்திட்டத்தின் முக்கிய நோக்கங்களாக பருத்தி உற்பத்தி மற்றும் உற்பத்தி திறன் அதிகரிப்பு, உயர் அடர்த்தி நடவு முறை (HDPS), நெருக்கமான இடைவெளி சாகுபடி (Closer Spacing) போன்ற நவீன தொழில்நுட்ப முறைகளை பயன்படுத்துதல், பருத்தி விவசாயத்தில் வருமானத்தை அதிகப்படுத்துதல் போன்றவற்றிற்காக இத்திட்டம் 2026-27-ஆம் ஆண்டிலிருந்து செயல்படுத்தப்பட உள்ளது. இத்திட்டத்தில் குறைந்த பரப்பளவில் அதிக செடிகளை பயிரிடும் முறைகளான உயர் அடர்த்தி நடவு முறை (High Density Planting System) செயல்விளக்கத்திடலுக்கு ரூ.14,000/-யும், நெருக்கமான இடைவெளி சாகுபடி (Closer Spacing) செயல்விளக்கத்திடலுக்கு ரூ.18,500/-யும், மிக நீண்ட இழையுடைய பருத்தி சாகுபடி (Extra Long Stable Cotton Cultivation) செயல்விளக்கத்திடலுக்கு ரூ.9,500/-யும், பருத்தியின் வளர்ச்சியை மேம்படுத்தவும், அதிக மகசூல் பெறவும், ஒருங்கிணைந்த பயிர் மேலாண்மை சாகுபடி (Integrated Crop Management) செயல்விளக்கத்திடலுக்கு ரூ.7,500/-இம், ட்ரோன் மூலம் பயிர் பாதுகாப்பு மருந்து தெளிப்புக்கான செலவில் 50% மானியமும் மற்றும் மேற்குறிப்பிட்ட சாகுபடி தொடர்பான பயிற்சிகள் விவசாயிகளுக்கு வழங்கப்படவுள்ளது. விருதுநகர் மாவட்டத்திற்கு மேற்குறிப்பிட்ட சாகுபடி செயல்விளக்க திடல்கள் 1660 எக்டேரும், ட்ரோன் மூலம் மருந்து தெளிப்பு மானியம் 800 எக்டேருக்கும் இலக்கு நிர்ணயிக்கப்பட்டுள்ளது. மேற்கூறிய திட்டத்தில் விவசாயிகள் உழவன் செயலி மூலம் பதிவு செய்தும் அல்லது தங்கள் பகுதி வேளாண்மை உதவி இயக்குநர் அலுவலகங்களை தொடர்பு கொண்டும் பயன்பெறலாம் என மாவட்ட ஆட்சித்தலைவர் திருமதி.ஷரண்யா அறி I A S., அவர்கள் தெரிவித்துள்ளார்.
விருதுநகர் மாவட்ட ஆட்சித்தலைவர் திருமதி ஷரண்யா அறி I A S., அவர்கள் விருதுநகர் மாவட்ட அரசு மருத்துவக் கல்லூரி மருத்துவமனையில் தாய்மாமன் தங்க மோதிரம் திட்டம் செயலாக்கத்திற்கான முன்னேற்பாடு பணிகள் குறித்து (26.09.2026) பார்வையிட்டு ஆய்வு செய்தார். தமிழ்நாடு முதலமைச்சர் அவர்கள் அரசு மருத்துவமனைகளில் பிரசவிக்கும் ஒவ்வொரு குழந்தையையும் மற்றும் பிரசவித்த தாயையும் கௌரவிக்கும் விதமாக தாய்மாமன் தங்க மோதிரம் திட்டத்தினை வருகின்ற 28.09.2026 அன்று மதுரை ராஜாஜி அரசு மருத்துவமனையில் தொடங்கி வைக்கவுள்ளார்.விருதுநகர் மாவட்டத்தில் விருதுநகர், அருப்புக்கோட்டை, சிவகாசி, திருவில்லிபுத்தூர், இராஜபாளையம் ஆகிய 5 வட்டார அரசு தலைமை மருத்துவமனைகளில் நடைபெறவுள்ள நிகழ்ச்சியில் இத்திட்டத்தின் கீழ் தங்க மோதிரம் வழங்கப்படவுள்ளது.மாவட்டத்தில் உள்ள 60 அரசு ஆரம்ப சுகாதார நிலையங்கள், 9 அரசு மருத்துவமனைகள், 1 அரசு மருத்துவக்கல்லூரி மருத்துவமனை ஆகியவற்றில் 15.09.2026 அன்று முதல் அரசு மருத்துவமனையில் பிறக்கும் குழந்தைகளுக்கு தாய்மாமன் தங்க மோதிரம் திட்டத்தின் கீழ் தலா 1 கிராம் தங்க மோதிரம் வழங்கப்படவுள்ளது. மாவட்டத்தில் அரசு மருத்துவமனைகளில் நாளொன்றுக்கு சராசரியாக 25 முதல் 30 குழந்தைகள் பிறக்கின்றன.அதன்படி, விருதுநகர் அரசு மருத்துவக்கல்லூரி மருத்துவமனையில், தாய்மாமன் தங்க மோதிரம் வழங்கும் திட்டம் தொடர்பாக மேற்கொள்ளப்பட்டு வரும் முன்னேற்பாடு பணிகள் குறித்து ஆய்வு செய்யப்பட்டது.இந்த ஆய்வின்போது, தாய்மாமன் தங்க மோதிரம் வழங்கும் திட்டத்தின் கீழ் நடைபெறவுள்ள நிகழ்ச்சிக்கான ஏற்பாடுகள், தங்க மோதிரம் வைப்பறைகள், அதற்கான பாதுகாப்பு வசதிகள், நிகழ்ச்சி நடைபெறும் இடம், பயனாளிகள் அமர்வதற்கான ஏற்பாடுகள், வருகை தரும் பயனாளிகளுக்கு முறையாக வசதிகளை ஏற்படுத்தி தருதல், பாதுகாப்பு ஏற்பாடுகள், குடிநீர் வசதி, சுகாதார வசதி, மின்சார வசதி உள்ளிட்ட அடிப்படை வசதிகள் குறித்தும் ஆய்வு செய்யப்பட்டது. தொடர்ந்து, அரசு மருத்துவ அலுவலர்களுடன் ஆலோசனைக் கூட்டம் நடத்தி, விழாவிற்கான ஏற்பாடுகள், பயனாளிகளுக்கான வசதிகள், ஒவ்வொரு அலுவலர்களுக்கும் ஒதுக்கப்பட்டுள்ள பணிகளை அலுவலர்கள் பொறுப்புடன் மேற்கொண்டு, முன்னேற்பாடு பணிகளை நிறைவு செய்து, விழா சிறப்பாக நடைபெறுவதை உறுதி செய்ய அறிவுத்தப்பட்டுள்ளது என மாவட்ட ஆட்சித்தலைவர் அவர்கள் தெரிவித்தார்.இந்த ஆய்வின்போது, அரசு மருத்துவ கல்லூரி முதல்வர் மரு.அமுதா ராணி, மாவட்ட சுகாதார அலுவலர்(விருதுநகர்) மரு.வே.யசோதாமணி, மருத்துவர்கள், சுகாதாரத்துறை அலுவலர்கள் மற்றும் அரசு அலுவலர்கள் உடனிருந்தனர்.
விருதுநகர் ரயில்வே பீடர் சாலையில்(தேவகி ஸ்கேன் மையம் அருகில்) புதிய நவீன ஆதார் சேவை மையத்தினை(Aadhaar Seva Kendra) மாவட்ட ஆட்சித்தலைவர் திருமதி ஷரண்யா அறி I A S., அவர்கள் திறந்து வைத்து குத்துவிளக்கேற்றி அதன் செயல்பாட்டை பொதுமக்களின் சேவைக்காக தொடங்கி வைத்தார்.பொதுமக்களின் அன்றாட தேவைகளில் ஆதார் அட்டை முக்கிய ஆவணமாக விளங்கி வருகிறது. அரசு நலத்திட்ட உதவிகள், கல்வி, வங்கிச் சேவைகள், சமூகப் பாதுகாப்புத் திட்டங்கள் உள்ளிட்ட பல்வேறு சேவைகளைப் பெறுவதற்கு ஆதார் தொடர்பான விவரங்கள் சரியாகவும், புதுப்பிக்கப்பட்ட நிலையிலும் இருப்பது அவசியமாகும். இதனை கருத்தில் கொண்டு, பொதுமக்கள் தங்களது ஆதார் தொடர்பான சேவைகளை ஒரே இடத்தில் எளிதாகப் பெறும் வகையில் புதிய ஆதார் சேவை மையம் நவீன வசதிகளுடன் ஏற்படுத்தப்பட்டுள்ளது.இந்த புதிய ஆதார் சேவை மையத்தில், பொதுமக்களுக்கு பெயர், முகவரி, பிறந்த தேதி உள்ளிட்ட விவரங்களைப் புதுப்பித்தல், மொபைல் எண் மற்றும் மின்னஞ்சல் முகவரி மாற்றம், புகைப்படம், கைரேகை, கருவிழி ஸ்கேன் உள்ளிட்ட பயோமெட்ரிக் புதுப்பிப்பு, ஆதார் அட்டை பதிவிறக்கம் மற்றும் அச்சுப் பிரதியைப் பெறுதல், குழந்தைகளுக்கான ஆதார் பதிவு மற்றும் கட்டாய பயோமெட்ரிக் புதுப்பிப்பு உள்ளிட்ட பல்வேறு ஆதார் சார்ந்த சேவைகளைப் பெறுவதற்கான வசதிகள் ஏற்படுத்தப்பட்டுள்ளன.மேலும், பொதுமக்கள் தங்களது ஆதார் தொடர்பான பணிகளுக்காக பல்வேறு இடங்களுக்குச் செல்ல வேண்டிய சிரமத்தைத் தவிர்த்து, ஒரே இடத்தில் உரிய வழிகாட்டுதலுடன் சேவைகளைப் பெறும் வகையில் இந்த சேவை மையம் செயல்பட உள்ளது. எனவே, பொதுமக்கள் இந்த புதிய நவீன ஆதார் சேவை மையத்தினை பயன்படுத்தி தங்களுக்குத் தேவையான ஆதார் தொடர்பான சேவைகளைப் பெற்று பயன்பெறலாம் என மாவட்ட ஆட்சித்தலைவர் அவர்கள் தெரிவித்தார்.இந்த நிகழ்வின் போது, ஆதார் சேவை மைய மேலாளர் திரு.பூபதி ராஜா, பணியாளர்கள், பொதுமக்கள் உட்பட பலர் கலந்து கொண்டனர்.
விருதுநகர் மாவட்டத்திற்கு உட்பட்ட 450 கிராம ஊராட்சிகளில் காந்தி ஜெயந்தி தினமான 02.10.2026 – அன்று கிராம சபைக் கூட்டம் நடைபெறவுள்ளது. இக்கூட்டத்தில் கீழ்க்காணும் கூட்டப் பொருள்கள் குறித்து விவாதிக்கப்பட உள்ளது.கிராம ஊராட்சி நிர்வாகம் மற்றும் பொது நிதி செலவினம் குறித்து விவாதித்தல். (01.04.2026 முதல் 30.09.2026 வரை) , தூய்மையான குடிநீர் விநியோகத்தினை உறுதி செய்வது குறித்து விவாதித்தல் , பாரதம் கிராம வேலை உறுதி மற்றும் வாழ்வாதார திட்டம், சிறுபாசனங்கள் , குளங்கள் மற்றும் ஏரிகள் புதுப்பித்தல், ஜல் ஜீவன் திட்டம், தூய்மை பாரத இயக்க (ஊரகம்) திட்டம், இதர பொருட்கள் குறித்து விவாதித்தல்.எனவே, 02.10.2026 அன்று நடைபெறவுள்ள கிராம சபை கூட்டத்தில் பொதுமக்கள் அனைவரும் தவறாது கலந்து கொள்ள வேண்டும் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
விருதுநகர் மாவட்ட ஆட்சியர் அலுவலகத்தில் "திசை- தமிழை அறிவோம்" தமிழி வரி வடிவங்களை அறிதல் பயிற்சி பெற்று 1330 திருக்குறளை தமிழி வடிவத்தில் எழுதிய மாணவிகள் மாவட்ட ஆட்சித் தலைவர் திருமதி ஷரண்யா அறி I A S., அவர்களை (25.09.2026) சந்தித்து வாழ்த்து பெற்றனர்.கடந்த மாதம் 20.08.2026 அன்று விருதுநகர் அரசு அருங்காட்சியகத்தில் விருதுநகர் ஒன்றியத்தை சேர்ந்த 25 பள்ளி ஆசிரியர்கள் மற்றும் மாணவர்களுக்கு, திசை- தமிழை அறிவோம் தமிழி வரி வடிவங்களை அறிதல் ஒரு நாள் பயிற்சி பட்டறை நடத்தப்பட்டது. அதன் விளைவாக ஆசிரியர்கள் மற்றும் மாணவர்கள் தமிழி எழுத்துக்களை எழுத வாசிக்க பழகியுள்ளனர்.இதன் தொடர்ச்சியாக இனாம் ரெட்டியாபட்டி அரசு உயர்நிலைப்பள்ளி மாணவிகள் உலகப் பொதுமறையாம் திருக்குறளின் 1330 குறள்களையும் தமிழி (பிராமி) எழுத்து வரி வடிவில் வடித்துள்ளனர். அம்மாணவர்களுக்கு ஊக்கமும் ஆக்கமும் வழங்கி பாராட்டும் விதமாக மாவட்ட ஆட்சித்தலைவர் அவர்கள் அம்மாணவிகளை நேரில் அழைத்து வாழ்த்தினார்.இந்நிகழ்வின் போது முதன்மை கல்வி அலுவலர் திரு.அரவிந்தன், அருங்காட்சியக காப்பாட்சியர் திரு.பால்துரை, பள்ளி தலைமையாசிரியர், ஆசிரியர் ஆகியோர் உடன் இருந்தனர்.
விருதுநகர் மாவட்ட ஆட்சியர் அலுவலக கூட்டரங்கில் (25.09.2026) விவசாயிகள் குறைதீர்க்கும் நாள் கூட்டம்மாவட்ட ஆட்சித்தலைவர் திருமதி ஷரண்யா அறி I A S ., அவர்கள் தலைமையில் நடைபெற்றது.இக்கூட்டத்தில் கடந்த மாதம் நடைபெற்ற விவசாயிகள் குறை தீர்க்கும் நாள் கூட்டத்தில் விவசாயிகளால் வழங்கப்பட்ட மனுக்கள் மீது எடுக்கப்பட்ட நடவடிக்கைகள் குறித்து எடுத்துரைக்கப்பட்டது. இக்கூட்டத்தில், பருத்தி சாகுபடிக்கான மானியம் வழங்க வேண்டும். பருத்தி உற்பத்தியினை அதிகரிக்க வேண்டும். வறட்சியால் பாதிக்கப்பட்ட பயிர்களுக்கு உரிய காலத்தில் நிவாரணம் வழங்கிட நடவடிக்கை மேற்கொள்ள வேண்டும். விவசாய மின் இணைப்புகளுக்கு பதிவு மூப்பு அடிப்படையில் விரைந்து வழங்க வேண்டும். வனவிலங்குகள் விளைநிலங்களுக்குள் புகுவதை தடுக்க நடவடிக்கை மேற்கொள்ள வேண்டும். நீர் நிலைகளில் உள்ள ஆக்கிரமிப்புகளை அகற்ற நடவடிக்கை மேற்கொள்ள வேண்டும். பண்ணை குட்டை அமைப்பதற்கு மானியம் வேண்டுதல். உரிய ஆவணங்களின் அடிப்படையில் வண்டல் மண் எடுத்து பயன்படுத்துவதற்கு விவசாயிகளுக்கு அனுமதி வழங்கிட வேண்டும். மேட்டுப்பட்டி மற்றும் வெங்கடாச்சலபுரம் கிராமங்களில் உலர்களம் அமைத்துக் கொடுக்க வேண்டும். காரியாப்பட்டி வட்டாரத்தில் நிலக்கடலை விதை காலதாமதமின்றி உரிய பருவகாலத்திற்குள் விவசாயிகளுக்கு வழங்க நடவடிக்கை எடுக்க வேண்டும். எஸ்.கொடிகுளம் கண்மாயின் தென்மேற்கு முனையிலிருந்து கூமாபட்டி இராமசாமியாபுரம் இடையே வரை உள்ள நீர் வரத்து ஓடையை அளந்து ஆக்கிரமிப்பை அகற்ற வேண்டும் உள்ளிட்ட கோரிக்கைகளை விவசாயிகள் வைத்தனர்.விருதுநகர் மாவட்டத்திற்கு கூடுதல் 21 உலர்களம் அமைத்திட சென்னை இயக்குநகரத்திற்கு கருத்துரு அனுப்பப்பட்டுள்ளது. அனுமதி வரப்பெற்றதும் தேவைப்படும் இடங்களில் உலர்களம் அமைக்க நடவடிக்கை எடுக்கப்படும். இராஜபாளையம் வட்டாரம், மேட்டுபட்டி கிராமத்தில் நெல்குடோன் கட்டித்தர நடவடிக்கை எடுக்கப்படும். உழவன் செயலி மூலம் இ-வாடகை mts.aed.tn.gov.in என்ற இணைய தளத்தில் விவசாயிகள் உரிய ஆவணங்களுடன் விண்ணப்பித்து பயன்பெறலாம்.எஸ்.கொடிகுளம் கண்மாயின் தென்மேற்கு முனையிலிருந்து கூமாபட்டி இராமசாமியாபுரம் இடையே வரை உள்ள நீர் வரத்து ஓடையை அளவீடு செய்ய அறிவுறுத்தப்பட்டுள்ளது. கண்மாய் மற்றும் குளங்களில் உள்ள சீமைகருவேல மரங்களை அகற்ற நடவடிக்கை எடுக்கப்படும்.மேலும், மாவட்டத்திலுள்ள வேளாண் விரிவாக்க மையங்களில் நெல் விதைகள் 187.785 மெட்ரிக் டன்னும், சோளம் விதைகள் 3.571 மெட்ரிக் டன்னும், கம்பு விதைகள் 3.640 மெட்ரிக் டன்னும், குதிரைவாலி விதைகள் 8.630 மெட்ரிக் டன்னும், வரகு விதைகள் 0.490 மெட்ரிக் டன்னும், தினை விதைகள் 0.120 மெட்ரிக் டன்னும், மக்காச்சோளம் விதைகள் 79.960 மெட்ரிக் டன்னும், பாசிப்பயறு விதைகள் 4.087 மெட்ரிக் டன்னும், உளுந்து விகைள் 19.540 மெட்ரிக் டன்னும், துவரை விதைகள் 1.673 மெட்ரிக் டன்னும், நிலக்கடலை விதைகள் 22.176 மெட்ரிக் டன்னும், எள் விதைகள் 1.498 மெட்ரிக் டன்னும் என மொத்தம் 333.170 மெட்ரிக் டன் விதைகளும்,தனியார் விற்பனை மையங்களில் நெல் விதைகள் 170.835 மெட்ரிக் டன்னும், சோளம் விதைகள் 1.2 மெட்ரிக் டன்னும், கம்பு விதைகள் 0.613 மெட்ரிக் டன்னும், மக்காச்சோளம் விதைகள் 154.30 மெட்ரிக் டன்னும், பாசிப்பயறு விதைகள் 1.70 மெட்ரிக் டன்னும், உளுந்து விகைள் 23.975 மெட்ரிக் டன்னும், பருத்தி விதைகள் 16.188 மெட்ரிக் டன்னும், சூரிய காந்தி விதைகள் 3.627 மெட்ரிக் டன்னும் என மொத்தம் 372.438 மெட்ரிக் டன் விதைகளும் என ஆக மொத்தம் 705.608 மெட்ரிக் டன் விதைகள் இருப்பு உள்ளது என மாவட்ட ஆட்சித்தலைவர் திருமதி ஷரண்யா அறி இ.ஆ.ப., அவர்கள் தெரிவித்தார்.இக்கூட்டத்தில், மாவட்ட வருவாய் அலுவலர் திருமதி ஆனந்தி, வேளாண்மை இணை இயக்குநர் திரு.மோகன்தாஸ் சௌமியன், கூட்டுறவு சங்கங்களின் மண்டல இணைப்பதிவாளர் திரு.திருப்பதி, மண்டல மேலாளர் (தமிழ்நாடு நுகர்பொருள் வாணிப கழகம்) திரு.பால்பாண்டி, மாவட்ட ஆட்சியரின் நேர்முக உதவியாளர்(வேளாண்மை) திருமதி அ.அம்சவேணி, செயற்பொறியாளர் (வேளாண்மை பொறியியல் துறை) திருமதி இந்திரா, தோட்டக்கலை துணை இயக்குநர் திரு.அ.ஆறுமுகம், வேளாண்மை துணை இயக்குநர்(வேளாண் வணிகம் மற்றும் விற்பனை) திருமதி வளர்மதி, அருப்புக்கோட்டை வேளாண் அறிவியல் நிலைய பேராசிரியர் ஆனந்தி, உட்பட பல துறை அரசு அலுவலர்கள் கலந்து கொண்டனர்.
விருதுநகர், செப்டம்பர் 23: பத்திரப்பதிவு அலுவலக வரைவு வழிகாட்டி மதிப்பு குறித்து ஆட்சேபனை இருந்தால் தெரிவிக்க விருதுநகர் மாவட்ட ஆட்சித்தலைவர் திருமதி ஷரண்யா அறி இ.ஆ.ப., அவர்கள் அழைப்பு விடுத்துள்ளார்.இது தொடர்பாக அவர் வெளியிட்டுள்ள செய்திக் குறிப்பில், விருதுநகர் மாவட்டத்தில் உள்ள வருவாய் கிராமங்கள் வாரியாக மனை மற்றும் விளைநிலங்களின் வழிகாட்டி மதிப்பில் உள்ள முரண்பாடுகளை களைந்திடும் வகையில் வரைவு வழிகாட்டி மதிப்பு தயாரிக்கப்பட்டு பொதுமக்கள் பார்வையிடும் வகையில் விருதுநகர் மாவட்டத்தில் உள்ள வட்டாட்சியர் அலுவலகங்கள், சார் - பதிவாளர் அலுவலகங்கள் உள்பட முக்கிய அரசு அலுவலகங்களில் வைக்கப்பட்டுள்ளன.இதன் மீது ஏதேனும் ஆட்சேபனைகள் மற்றும் கருத்துரைகள் இருப்பின், அதனை 15 நாள்களுக்குள் மாவட்ட ஆட்சியர் தலைமையிலான ”மதிப்பீட்டு துணைக்குழுவிடம்,” மதிப்பீட்டு துணைக்குழு. மாவட்டப் பதிவாளர் (நிர்வாகம்), மாவட்டப் பதிவாளர் அலுவலகம், விருதுநகர் பதிவு மாவட்டம்" என்ற முகவரிக்கு அஞ்சலிலோ அல்லது நேரிலோ சந்தித்து தெரிவிக்கலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
தமிழ்நாட்டில் உள்ள நியாயவிலைக் கடைகளில் e-KYC பதிவு மேற்கொள்ளாத அனைத்து குடும்ப அட்டை பயனாளிகளுக்கும் 26.09.2026 அன்று அனைத்து நியாயவிலைக் கடைகளிலும் விற்பனை முனைய இயந்திரம் மூலமாக விரல் ரேகை/ கண் கருவிழி சரிபார்ப்பின் மூலம் e-KYC பதிவு மேற்கொள்ள தமிழ்நாடு அரசால் அறிவுறுத்தப்பட்டுள்ளது. அதன்படி, விருதுநகர் மாவட்டத்தில் e-KYC பதிவினை 100% நிறைவு செய்யும் பொருட்டு 26.09.2026 அன்று அனைத்து நியாயவிலைக் கடைகளிலும் சிறப்பு முகாம் நடைபெறவுள்ளது.எனவே, விருதுநகர் மாவட்டத்தில் உள்ள e-KYC பதிவு மேற்கொள்ளாத குடும்ப அட்டைதாரர்கள் அனைவரும் அருகில் உள்ள நியாயவிலைக் கடைகளுக்கு 26.09.2026 அன்று நேரில் சென்று e-KYC பதிவு செய்யமாறு கேட்டுக் கொள்ளப்படுகின்றனர்.மேலும் குடும்ப அட்டையில் உள்ள உறுப்பினர்களில் e-KYC பதிவு செய்யாத எவரேனும் பணிநிமித்தமாக தமிழ்நாட்டின் வேறு பகுதிகளில் தற்காலிகமாக வசிப்பவர் எனில், அவர்களும் தற்போது வசிக்கும் பகுதிக்கு அருகில் உள்ள நியாயவிலைக் கடைகளுக்கு தமது குடும்ப அட்டை விபரத்துடன் சென்று e-KYC பதிவு செய்யலாம்.எனவே, e-KYC பதிவு செய்யாமல் உள்ள குடும்ப அட்டை உறுப்பினர்கள் அனைவரும் 26.09.2026 அன்று நடைபெறும் சிறப்பு முகாமில் அவசியம் e-KYC பதிவு மேற்கொண்டு விருதுநகர் மாவட்டத்தில் e-KYC பதிவு செய்யும் பணி 100% நிறைவு பெற்றிடுவதற்கு ஒத்துழைப்பு நல்குமாறு மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
