செய்தி மக்கள் தொடர்பு அலுவலகம் விருதுநகர் மாவட்டம்

மக்கள் குறைதீர்க்கும் நாள் கூட்டத்தில் ரூ.3.77 இலட்சம் மதிப்பிலான நலத்திட்ட உதவிகளை மாவட்ட ஆட்சித்தலைவர் அவர்கள் வழங்கினார்.

Oct 13, 2026

மக்கள் குறைதீர்க்கும் நாள் கூட்டத்தில் ரூ.3.77 இலட்சம் மதிப்பிலான நலத்திட்ட உதவிகளை மாவட்ட ஆட்சித்தலைவர் அவர்கள் வழங்கினார்.

விருதுநகர் மாவட்ட ஆட்சியர் அலுவலகக் கூட்டரங்கில் மக்கள் குறைதீர்க்கும் நாள் கூட்டம் மாவட்ட ஆட்சித்தலைவர் திருமதி ஷரண்யா அறி I A S, அவர்கள் தலைமையில் (12.10.2026) நடைபெற்றது.இக்கூட்டத்தில், பொதுமக்கள் மற்றும் மாற்றுத்திறனாளிகளிடமிருந்து இலவச வீட்டுமனைப்பட்டா, பட்டா மாறுதல், புதிய குடும்ப அட்டை, வேலைவாய்ப்பு, விபத்து நிவாரணம், மாற்றுத்திறனாளிகள் மற்றும் நலிந்தோர் நல உதவித்திட்டங்கள், விதவை உதவித்தொகை, திருமண உதவித்தொகை மற்றும் முதியோர் உதவித்தொகை உள்ளிட்ட பல்வேறு கோரிக்கைகள் குறித்தான மனுக்கள் பெறப்பட்டன.மேலும், மாவட்ட ஆட்சித்தலைவர் அவர்கள் மாற்றுத்திறனாளிகள் மற்றும் மூத்த குடிமக்களுக்காக அமைக்கப்பட்டுள்ள சிறப்பு அமருமிடத்திற்கு நேரடியாகச் சென்று, அவர்களின் கோரிக்கை மனுக்களைப் பெற்று பரிசீலித்தார். பொதுமக்களிடமிருந்து பெறப்பட்ட இம்மனுக்கள் அனைத்தையும் சம்பந்தப்பட்ட துறை அலுவலர்களிடம் ஒப்படைத்து, அவற்றின் மீது உரிய மற்றும் விரைவான நடவடிக்கை எடுக்கவும், முதலமைச்சரின் தனிப்பிரிவு மனுக்கள் மீது கூடுதல் கவனம் செலுத்தி விரைந்து தீர்வு காணவேண்டும் என உத்தரவிட்டார்.இக்கூட்டத்தில், மாற்றுத்திறனாளிகள் நலத்துறையின் சார்பில் 4 மாற்றுத்திறனாளிகளுக்கு ரூ.1,07,200/- மதிப்பிலான நவீன செயற்கை கால்களையும், மாவட்ட ஆதி திராவிடர் மற்றும் பழங்குடியினர் நலத்துறையின் சார்பில் புதிரை வண்ணார் நல வாரியம் மூலம் 26 பயனாளிகளுக்கு ரூ.2,70,000/- மதிப்பிலான நலத்திட்ட உதவிகளுக்கான காசேலையினையையும், மாவட்ட ஊரக வளர்ச்சி மற்றும் ஊராட்சித்துறையின் சார்பில் பணியின் போது பணியிடை மரணம் அடைந்தவரின் வாரிசுதாரருக்கு கருணை அடிப்படையிலான பணி நியமன ஆணையினையும்,மேலும், வருவாய் மற்றும் பேரிடர் மேலாண்மைத்துறையின் சார்பில் விருதுநகர் வட்டத்தைச் சேர்ந்த 58 பயனாளிகள் மற்றும் பிற்படுத்தப்பட்டோர் நலத்துறை சார்பில் அருப்புக்கோட்டை வட்டத்தைச் சேர்ந்த 66 பயனாளிகள் என மொத்தம் 124 பயனாளிகளுக்கு இ-பட்டாக்களையும் மாவட்ட ஆட்சித்தலைவர் அவர்கள் வழங்கினார்.பின்னர், நரிக்குடி, திருச்சுழி வட்டாரங்களில் ஒருங்கிணைந்த குழந்தைகள் வளர்ச்சி பணிகள் திட்டத்தின் கீழ் குழந்தைகள் நல மையங்களில் பயன்பெறும் பயனாளிகளில் கடுமையான ஊட்டச்சத்து குறைபாடுள்ள (0-6 மாதம் முதல் 6 வயது வரை) 338 குழந்தைகளுக்கு அவர்களின் ஊட்டச்சத்து நிலையின் முன்னேற்றத்தை கருத்தில் கொண்டு வளமிகு வட்டார வள மையத்தின் மூலம் முன் அடையாளமாக 10 குழந்தைகளுக்கு ஊட்டச்சத்து பெட்டகத்தினை வழங்கி இத்திட்டத்தை துவக்கி வைத்தார்.தொடர்ந்து, பொதுமக்களிடமிருந்து 678 மனுக்கள் பெறப்பட்டன. இம்மனுக்கள் சம்மந்தப்பட்ட துறை அலுவலர்களிடம் உரிய நடவடிக்கை எடுக்க ஒப்படைக்கப்பட்டது.இக்கூட்டத்தில், மாவட்ட வருவாய் அலுவலர் திருமதி ஆனந்தி, மாவட்ட ஆட்சியரின் நேர்முக உதவியாளர் (நிலம்) திரு.சையது முகமது, தனித்துணை ஆட்சியர் (ச.பா.தி) திருமதி மோகனா, மாவட்ட ஆட்சியரின் நேர்முக உதவியாளர் (பொது) திரு.சோமசுந்தர சீனிவாசன், மாவட்ட வழங்கல் அலுவலர் திரு.அமர்நாத், மாற்றுத்திறனாளிகள் நலத்துறை அலுவலர் திரு.பிரம்ம நாயகம், அரசுத் துறை அலுவலர்கள் மற்றும் பொதுமக்கள் உட்பட பலர் கலந்து கொண்டனர்.

மக்கள் தொடர்பு திட்ட முகாம் 14.10.2026 அன்று மாவட்ட ஆட்சித்தலைவர் அவர்கள் தலைமையில் நடைபெறவுள்ளது.

செய்தி மக்கள் தொடர்பு அலுவலகம் விருதுநகர் மாவட்டம்

Oct 13, 2026

மக்கள் தொடர்பு திட்ட முகாம் 14.10.2026 அன்று மாவட்ட ஆட்சித்தலைவர் அவர்கள் தலைமையில் நடைபெறவுள்ளது.

மாவட்ட ஆட்சியர் மற்றும் மாவட்ட அளவிலான அலுவலர்கள் மக்களைத் தேடிச் சென்று குறைகளைக் கேட்டறியவும், பல்வேறு துறைகளின் மூலம் செயல்படுத்தப்படும் திட்டங்கள், செயல்பாடுகளை விரைவுபடுத்தவும் மற்றும் வழங்கப்படும் சேவைகளின் தரத்தை மேம்படுத்தவும், மக்களை நாடி மக்கள் குறைகளைக் கேட்டு, உடனுக்குடன் தீர்வு காண மக்கள் தொடர்பு திட்டம் மாவட்ட ஆட்சியர் தலைமையில் ஒவ்வொரு மாதமும் 2வது புதன் கிழமை நடத்தப்பட்டு வருகிறது.தற்போது, விருதுநகர் மாவட்டம், ‘திருச்சுழி வட்டம், பி.புதுப்பட்டி கிராமத்தில்” உள்ள “சமுதாயகூடத்தில்” வைத்து 14.10.2026ஆம் தேதியன்று காலை 10.00 மணி அளவில் மாவட்ட ஆட்சியரின் தலைமையில் நடைபெற உள்ளது. மேலும் 14.10.2026ஆம் தேதியன்று காலை 10.00 மணி முதல் மதியம் 01.00 மணி வரை மாவட்ட ஆட்சியர் மற்றும் மாவட்ட அளவிலான அனைத்து மாவட்ட நிலை அலுவலர்களும் திருச்சுழி வட்டத்தில் உள்ள பி.புதுப்பட்டி கிராமத்தில் உள்ள மக்களின் குறைகளைக் கேட்டறிந்து, அரசின் அனைத்து நலத்திட்டங்களும் மற்றும் சேவைகளும், தங்கு தடையின்றி மக்களை சென்றடைவதை ஆய்வு செய்ய உள்ளனர். மேலும், அன்றைய தினம் நடைபெறும் முகாமில் பொது மக்களிடமிருந்து கோரிக்கை மனுக்கள் பெறவும் நடவடிக்கை எடுக்கப்பட்டுள்ளன. எனவே “திருச்சுழி வட்டம் பி.புதுப்பட்டி கிராமத்தில்” உள்ள பொதுமக்கள் தங்களது கோரிக்கைகளை மனுக்களாக மாவட்ட ஆட்சியர் அவர்களிடம் நேரில் அளித்து குறைகளை நிவர்த்தி செய்துகொள்ளவும், அரசின் திட்டங்கள் முழுமையாக கிடைத்திட இந்த அரிய வாய்ப்பினை பயன்படுத்திக் கொள்ளுமாறு கேட்டுக்கொள்ளப்படுகிறார்கள்.

பிற்படுத்தப்பட்டோர், பொருளாதாரத்தில் பின்தங்கியவர்கள், சீர்மரபினர் மாணவ/மாணவியர்கள் ஒன்றிய அரசின் கல்வி உதவித்தொகைக்கு விண்ணப்பிக்க கால நீட்டிப்பு செய்யப்பட்டுள்ளது.

செய்தி மக்கள் தொடர்பு அலுவலகம் விருதுநகர் மாவட்டம்

Oct 13, 2026

பிற்படுத்தப்பட்டோர், பொருளாதாரத்தில் பின்தங்கியவர்கள், சீர்மரபினர் மாணவ/மாணவியர்கள் ஒன்றிய அரசின் கல்வி உதவித்தொகைக்கு விண்ணப்பிக்க கால நீட்டிப்பு செய்யப்பட்டுள்ளது.

ஒன்றிய அரசால் இதர பிற்படுத்தப்பட்டோர், பொருளாதாரத்தில் பின்தங்கியவர்கள், சீர்மரபினர் மாணவ/மாணவியர்களுக்கு கல்வி உதவித்தொகை வழங்கும் வகையில் பிரதம மந்திரியின் கல்வி உதவித்தொகை திட்டம் (PM YASASVI- Top Class education in schools for OBC, EBC & DNT Students) செயல்படுத்தப்பட்டு வருகிறது.அதன்படி, 2026-27 ஆம் ஆண்டிற்கான தேசிய கல்வி உதவித்தொகை இணையதளத்தில் (National Scholarship Portal) அறிவிக்கப்பட்டுள்ளது. (Top class School) சிறந்த செயல்பாடு கல்வி நிறுவனம் (100% தேர்ச்சி பெற்றுள்ள) பள்ளிகளில் நடப்பாண்டில் 9 ஆம் வகுப்பு முதல் – 12 வகுப்பு வரை பயிலும் தமிழகத்தைச் சார்ந்த தகுதியான மாணவ/மாணவியர்கள் கல்வி உதவித்தொகை திட்டத்தில் புதுப்பித்தல் மற்றும் புதியதாக விண்ணப்பிப்பதற்கு தேசிய கல்வி உதவித்தொகை இணையதளத்தில் (https://scholarship.gov.in) விண்ணப்பிக்கலாம்.இத்திட்டத்தில் 9 மற்றும் 10 ஆம் வகுப்பு பயில்பவருக்கு கல்விக் கட்டணம், விடுதிக் கட்டணமாக ஆண்டொன்றுக்கு அதிகபட்சமாக ரூ.75,000/-, 11 மற்றும் 12 ஆம் வகுப்பு பயில்பவருக்கு ரூ.1,25,000/- வரை உதவித்தொகையாக ஒன்றிய அரசால் வழங்கப்பட்டு வருகிறது. இத்திட்டத்தில் பயன்பெற 30% மாணவியர்களுக்கு ஒதுக்கீடு செய்யப்பட்டுள்ளது.இத்திட்டத்தில் பயன்பெற மாணவ/மாணவியர் இதர பிற்படுத்தப்பட்ட வகுப்பினர் (OBC), பொருளாதாரத்தில் பின்தங்கிய வகுப்பினர் (EBC) அல்லது சீர்மரபினர் (DNT) பிரிவைச் சேர்ந்தவராக இருத்தல் வேண்டும். குடும்பத்தின் மொத்த ஆண்டு வருமானம் ரூ.2.50 இலட்சத்திற்கு மிகாமல் இருக்க வேண்டும். 2025-26 ஆம் கல்வியாண்டில் 100% தேர்ச்சி பெற்று தேசிய கல்வி உதவித்தொகை இணையதளத்தில் மத்திய அரசால் வெளியிடப்பட்டுள்ள பட்டியலில் இடம் பெற்றுள்ள பள்ளிகளில் பயில்பவராக இருத்தல் வேண்டும்.இத்திட்டத்தில் கடந்த நிதியாண்டில் 2025-26 கல்வி உதவித்தொகை பெற்று பயனடைந்த மாணவ/மாணவியர்கள் நடப்பாண்டில் (2026-27) 10 ஆம் வகுப்பு மற்றும் 12 ஆம் வகுப்பு விண்ணப்பத்தினை தேசிய கல்வி உதவித்தொகை இணையதளத்தில் உறுதிசெய்து (National Scholarship Portal - (https://scholarship.gov.in) கல்வி உதவித்தொகை படிவத்தை புதுப்பித்தல் (Renewal) செய்து இணைப்பில் பூர்த்தி செய்து 31.10.2026க்குள் விண்ணப்பித்திட வேண்டும். இணையதளத்தில் பூர்த்தி செய்யப்பட்டுள்ள மாணவ/மாணவிகளின் விண்ணப்பங்களை தத்தம் பள்ளி தலைமை ஆசிரியர்கள் சரிபார்ப்பதற்கான (புதுப்பித்தல் - for Renewal) கடைசி நாள்: 15.11.2026.மேலும், இத்திட்டத்திற்கு 2026-27-ஆம் ஆண்டிற்கு புதிதாக விண்ணப்பிக்க விரும்பும் 9 மற்றும் 11 ஆம் வகுப்புகளில் பயிலும் தகுதியுள்ள மாணவ/மாணவியர்கள் விண்ணப்பிப்பதற்கான தேதி NSP இணையத்தில் அறிவிக்கப்படும்.மேலும், இத்திட்டம் தொடர்பான கூடுதல் விபரங்கள் அறிந்திட National Scholarship portal (https://scholarship.gov.in) மற்றும் மத்திய அரசின் சமூக நீதி மற்றும் அதிகாரமளித்தல் துறையின் இணைதளத்தில் (https://socialjustice.gov.in) அறிந்துக் கொள்ளலாம். தகுதியான மாணவ/மாணவியர்கள் இத்திட்டத்தில் விண்ணப்பித்து பயன் பெறலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

வாக்காளர் பட்டியலில் பெயர் சேர்ப்பதற்காக நடைபெற்ற சிறப்பு முகாமினை மாவட்ட ஆட்சித்தலைவர் அவர்கள் பார்வையிட்டு ஆய்வு செய்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 12, 2026

வாக்காளர் பட்டியலில் பெயர் சேர்ப்பதற்காக நடைபெற்ற சிறப்பு முகாமினை மாவட்ட ஆட்சித்தலைவர் அவர்கள் பார்வையிட்டு ஆய்வு செய்தார்.

விருதுநகர் மாவட்டம் விருதுநகர் சட்டமன்ற தொகுதி வே.வ.வன்னியப்பெருமாள் கல்லூரி மற்றும் திருவள்ளுவர் வித்தியா சாலா பள்ளி ஆகிய வாக்குச்சாவடி மையங்களில் வாக்காளர் பட்டியலில் பெயர் சேர்ப்பதற்காக நடைபெற்ற சிறப்பு முகாம்களை மாவட்ட ஆட்சித்தலைவர், அவர்கள் (10.10.2026) பார்வையிட்டு ஆய்வு செய்தார்.மாவட்டத்தில் 01.01.2027 தகுதியாக கொண்டு 18 வயது நிரம்பிய தகுதியான வாக்காளர்களை வாக்காளர் பட்டியலில் சேர்த்தல், நீக்கம் செய்தல், திருத்தம் செய்தல் ஆகியவற்றிற்காக இன்று அந்தந்த வாக்குச்சாவடி மையங்களில் சிறப்பு முகாம்கள் நடத்தப்பட்டது.மாவட்டத்தில் 202-இராஜபாளையம் சட்டமன்றத் தொகுதியில் 1,04,604 ஆண்களும், 1,10,595 பெண்களும், 32 இதர பிரிவினரும், 203-ஸ்ரீவில்லிபுத்தூர் சட்டமன்றத் தொகுதியில் 1,09,305 ஆண்களும், 1,15,633 பெண்களும், 41 இதர பிரிவினரும், 204-சாத்தூர் சட்டமன்றத் தொகுதியில் 1,11,807 ஆண்களும், 1,18,512 பெண்களும், 63 இதர பிரிவினரும், 205-சிவகாசி சட்டமன்றத் தொகுதியில் 1,11,276 ஆண்களும், 1,18,200 பெண்களும், 28 இதர பிரிவினரும 206-விருதுநகர் சட்டமன்றத் தொகுதியில் 97,916 ஆண்களும், 1,03,845 பெண்களும், 40 இதர பிரிவினரும், 207-அருப்புக்கோட்டை சட்டமன்றத் தொகுதியில் 1,00,865 ஆண்களும், 1,07,442 பெண்களும், 30 இதர பிரிவினரும், 208-திருச்சுழி சட்டமன்றத் தொகுதியில் 1,01,409 ஆண்களும், 1,04,394 பெண்களும், 16 இதர பிரிவினரும் என ஆக மொத்தம் விருதுநகர் மாவட்டத்தில் 7,37,182 ஆண்களும், 7,78,621 பெண்களும், 250 இதர பிரிவினரும் என மொத்தம் 15,16,053 வாக்காளர்கள் உள்ளனர்.அதன்படி 202-இராஜபாளையம் சட்டமன்ற தொகுதியில் 269 வாக்குச்சாவடி மையங்கள், 203-திருவில்லிபுத்தூர் சட்டமன்ற தொகுதியில் 308 வாக்குச்சாவடி மையங்கள், 204-சாத்தூர் சட்டமன்ற தொகுதியில் 291 வாக்குச்சாவடி மையங்கள், 205-சிவகாசி சட்டமன்ற தொகுதியில் 288 வாக்குச்சாவடி மையங்கள், 206-விருதுநகர் சட்டமன்ற தொகுதியில் 281 வாக்குச்சாவடி மையங்கள், 207-அருப்புக்கோட்டை சட்டமன்ற தொகுதியில் 270 வாக்குச்சாவடி மையங்கள், 208- திருச்சுழி சட்டமன்ற தொகுதியில் 292 வாக்குச்சாவடி மையங்கள் என மொத்தம் 1999 வாக்குச்சாவடி மையங்களில் இந்த சிறப்பு முகாம்கள் நடைபெற்றன.இந்த சிறப்பு முகாமில் 1999 வாக்குச்சாவடி நிலைய அலுவலர்கள் (BLO), 202 கண்காணிப்பாளர்கள் பணியில் ஈடுபட்டனர் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்தார்.இந்நிகழ்வில் விருதுநகர் வட்டாட்சியர் திரு.சுந்தரமூர்த்தி, அரசு அலுவலர்கள் உட்பட பலர் கலந்து கொண்டனர்.

2026–2027 ஆம் கல்வியாண்டில் உயர்கல்வி நிறுவனங்களில் சேர்க்கை பெற்றுள்ள மாணவர்கள் கல்விக்கடன் பெறுவது தொடர்பான வழிகாட்டுதல்கள் பெற கல்வி உதவி மைய கட்டுப்பாட்டு அறையினை அணுகி பயன்பெறலாம்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 12, 2026

2026–2027 ஆம் கல்வியாண்டில் உயர்கல்வி நிறுவனங்களில் சேர்க்கை பெற்றுள்ள மாணவர்கள் கல்விக்கடன் பெறுவது தொடர்பான வழிகாட்டுதல்கள் பெற கல்வி உதவி மைய கட்டுப்பாட்டு அறையினை அணுகி பயன்பெறலாம்.

2026–2027 ஆம் கல்வியாண்டில் உயர்கல்வி நிறுவனங்களில் சேர்க்கை பெற்றுள்ள விருதுநகர் மாவட்ட மாணவர்கள் கல்விக் கடன் பெறுவது தொடர்பான தகவல்கள், வழிகாட்டுதல்கள் மற்றும் விண்ணப்ப நடைமுறைகள் குறித்து அறிந்துகொள்ள, விருதுநகர் மாவட்ட ஆட்சியர் அலுவலகத்தின் நான்காவது தளத்தில் இயங்கி வரும் கல்வி உதவி மையக் கட்டுப்பாட்டறையை நேரிலோ அல்லது (9976903873, 9698810699, 7598510114, 9566389092) ஆகிய தொலைபேசி எண்களின் வாயிலாகவோ தொடர்பு கொண்டு அறிந்து கொள்ளலாம்.அரசு பள்ளிகள் (Government), அரசு உதவி பெறும் பள்ளிகள் (Government Aided), மெட்ரிக் பள்ளிகள் (Matriculation), சி.பி.எஸ்.இ. பள்ளிகள் (CBSE) என அனைத்து வகைப் பள்ளி மாணவர்களுக்கும் பொருந்தும்.உயர்கல்வியில் சேர்க்கை பெற்றுள்ள மாணவர்கள் மற்றும் பெற்றோர்கள் இவ்வாய்ப்பைப் பயன்படுத்தி, கல்விக் கடன் தொடர்பான விவரங்களைப் பெற்று பயன் பெறலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

ஒப்பந்த அடிப்படையிலான தொழில்நுட்ப உதவியாளர் பணியிடத்திற்கு தகுதியான நபர்கள் விண்ணப்பிக்கலாம் என மாவட்ட ஆட்சித்தலைவர் அவர்கள் தெரிவித்துள்ளார்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 12, 2026

ஒப்பந்த அடிப்படையிலான தொழில்நுட்ப உதவியாளர் பணியிடத்திற்கு தகுதியான நபர்கள் விண்ணப்பிக்கலாம் என மாவட்ட ஆட்சித்தலைவர் அவர்கள் தெரிவித்துள்ளார்.

விருதுநகர் மாவட்ட காலநிலை மாற்ற இயக்கத்தின் (District Climate Change Mission) கீழ் தொழில்நுட்ப உதவியாளர் பணியிடத்திற்கு ஒப்பந்த அடிப்படையில் நிரப்புவதற்கு தகுதியான விண்ணப்பதாரர்களிடமிருந்து விண்ணப்பங்கள் வரவேற்கப்படுகின்றன.விண்ணப்பதாரர் விருதுநகர் மாவட்டத்தைச் சேர்ந்தவராக / மாவட்டத்தில் வசிப்பவராக இருக்க வேண்டும். விண்ணப்பதாரரின் வயது 40 வயதிற்கு மிகாமல் இருக்க வேண்டும். உயிரி அறிவியல், சுற்றுச்சூழல் அறிவியல், சூழலியல், வனவியல், வனவிலங்கு அறிவியல் அல்லது தொடர்புடைய இணையான துறைகளில் ஏதேனும் ஒன்றில் இளங்கலைப் பட்டம் பெற்றிருக்க வேண்டும்.தொழில்நுட்ப உதவியாளர் பணிக்கு மாதம் ரூ.22,000/- ஊதியத்துடன் ஒப்பந்த அடிப்படையில் பணியமர்த்தப்படுவர். விண்ணப்பதாரர்கள் தமிழ் மற்றும் ஆங்கிலத்தில் அடிப்படை தட்டச்சுத் திறன் பெற்றிருக்க வேண்டும். மேலும், அடிப்படை கணினி அறிவு மற்றும் MS Word, MS Excel, PowerPoint ஆகியவற்றை பயன்படுத்தும் திறன் பெற்றிருப்பது விரும்பத்தக்கது. அரசு அல்லது அரசு சார்ந்த நிறுவனங்களில் குறைந்தது ஓராண்டு பணியனுபவம் உள்ளவர்களுக்கு முன்னுரிமை வழங்கப்படும்.காலநிலை மாற்றம் மற்றும் சுற்றுச்சூழல் தொடர்பான பணிகளை ஒருங்கிணைத்தல், தரவு சேகரிப்பு, அறிக்கை தயாரித்தல், களப்பணிகள், விழிப்புணர்வு நிகழ்ச்சிகள் மற்றும் திறன் மேம்பாட்டு நிகழ்ச்சிகளை ஒருங்கிணைத்தல் போன்ற பணிகளில் அனுபவம் உள்ளவர்களுக்கு முன்னுரிமை வழங்கப்படும்.தகுதியும் விருப்பமும் உள்ளவர்கள் தங்களது சுயவிவரக் குறிப்பை (Resume/CV), கல்வித் தகுதி மற்றும் பிற தொடர்புடைய சான்றிதழ்களின் நகல்களுடன் climatechangemission.vnr@gmail.com என்ற மின்னஞ்சல் முகவரிக்கு அனுப்ப வேண்டும். விண்ணப்பங்கள் 20.10.2026 அன்று மாலை 5.00 மணிக்குள் வந்து சேர வேண்டும். குறிப்பிட்ட காலக்கெடுவிற்குப் பிறகு பெறப்படும் விண்ணப்பங்கள் ஏற்றுக்கொள்ளப்படமாட்டாது. தகுதியான விண்ணப்பதாரர்களுக்கு நேர்முகத் தேர்வு மற்றும் தட்டச்சுத் தேர்வு நடத்தப்பட்டு, தகுதியின் அடிப்படையில் தேர்வு செய்யப்படுவர். எனவே, தகுதியான நபர்கள் விண்ணப்பித்து பயன்பெறலாம் என மாவட்ட ஆட்சித்தலைவர் திருமதி ஷரண்யா அறிI A S., அவர்கள் தெரிவித்துள்ளார்.

மாவட்ட ஆட்சித்தலைவர் , அவர்கள், தகவல் அறியும் உரிமைச் சட்டம் – 2005 குறித்த விழிப்புணர்வு பேரணியை கொடியசைத்து தொடங்கி வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 10, 2026

மாவட்ட ஆட்சித்தலைவர் , அவர்கள், தகவல் அறியும் உரிமைச் சட்டம் – 2005 குறித்த விழிப்புணர்வு பேரணியை கொடியசைத்து தொடங்கி வைத்தார்.

விருதுநகர் மாவட்ட ஆட்சித்தலைவர் திருமதி ஷரண்யா அறி, I A S., அவர்கள், விருதுநகர் தேசபந்து மைதானத்தில் தகவல் அறியும் உரிமைச் சட்டம் – 2005 குறித்து பொதுமக்களிடையே விழிப்புணர்வை ஏற்படுத்தும் வகையில், (09.10.2026) விழிப்புணர்வு பேரணியை கொடியசைத்து தொடங்கி வைத்தார்.தகவல் அறியும் உரிமைச் சட்டம் என்பது அரசின் செயல்பாடுகளில் வெளிப்படைத்தன்மையையும், பொறுப்புணர்வையும் உறுதி செய்வதற்கான முக்கியமான சட்டமாகும். அரசுத் துறைகளின் செயல்பாடுகள், அரசு அலுவலகங்களில் மேற்கொள்ளப்படும் பணிகள் மற்றும் பொதுமக்களுக்குத் தேவையான நலத்திட்டங்கள் தொடர்பான தகவல்களை உரிய நடைமுறைகளின்படி அறிந்துகொண்டு விழிப்புணர்வுடன் செயல்படுவதற்கு இந்தச் சட்டம் வழிவகை செய்கிறது.அரசு அலுவலகங்களின் செயல்பாடுகள் குறித்த தகவல்களைப் பெற விரும்பும் பொதுமக்கள், சட்டத்தில் குறிப்பிடப்பட்டுள்ள நடைமுறைகளைப் பின்பற்றி உரிய அலுவலர்களிடம் விண்ணப்பிக்கலாம்.மேலும், மாணவர்கள், இளைஞர்கள் மற்றும் பொதுமக்கள் இச்சட்டத்தின் நோக்கம், பயன்பாடு மற்றும் விண்ணப்பிக்கும் நடைமுறைகள் குறித்து அறிந்துகொள்வது அவசியமாகும்.இச்சட்டம் குறித்த விழிப்புணர்வு பேரணிகள் மூலம் சட்டம் தொடர்பான புரிதலை பொதுமக்களிடையே ஏற்படுத்தி, பொறுப்புள்ள குடிமக்களாகச் செயல்படுவதற்கான விழிப்புணர்வை வளர்க்க முடியும். எனவே, பொதுமக்கள் தகவல் அறியும் உரிமைச் சட்டம் குறித்து தெரிந்துகொண்டு, அதன் மூலம் தங்களுக்குத் தேவையான தகவல்களை உரிய வழிமுறைகளில் பெற்றுப் பயன்பெற வேண்டும் என மாவட்ட ஆட்சித்தலைவர் அவர்கள் தெரிவித்தார்.இப்பேரணியில், சுமார் 100-க்கும் மேற்பட்ட பள்ளி மாணவர்கள் கலந்து கொண்டு விழிப்புணர்வு வாசகங்கள் அடங்கிய பதாகைகளை ஏந்திச் சென்று தேசபந்து மைதானம் முதல் நகரின் முக்கிய வீதிகள் வழியாக கே.வி.எஸ்.ஆண்கள் மேல்நிலைப்பள்ளி வரை பேரணியாக சென்று இச்சட்டத்தின் முக்கியத்துவம் மற்றும் பயன்பாடுகள் குறித்து பொதுமக்களிடையே விழிப்புணர்வு ஏற்படுத்தினர்.நிகழ்வில் மாவட்ட ஆட்சியரின் நேர்முக உதவியாளர் (பொது) பொறுப்பு திரு.சோமசுந்தர சீனிவாசன், அரசு அலுவலர்கள், மாணவர்கள் உட்பட பலர் கலந்து கொண்டனர்.

2027-ஆம் ஆண்டிற்கான தொழிற்சாலைகள் உரிமத்தினை 31.10.2026-க்குள் புதுப்பித்துக்கொள்ள வேண்டும் என மாவட்ட ஆட்சித்தலைவர் அவர்கள் தெரிவித்துள்ளார்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 10, 2026

2027-ஆம் ஆண்டிற்கான தொழிற்சாலைகள் உரிமத்தினை 31.10.2026-க்குள் புதுப்பித்துக்கொள்ள வேண்டும் என மாவட்ட ஆட்சித்தலைவர் அவர்கள் தெரிவித்துள்ளார்.

விருதுநகர் மாவட்டத்தில் விருதுநகர், சிவகாசி, வெம்பக்கோட்டை, சாத்தூர், அருப்புக்கோட்டை, திருச்சுழி, காரியாபட்டி ஆகிய தாலுகாக்களில் இயங்கிவரும் தொழிற்சாலைகள், 2027-ஆம் ஆண்டிற்கு தொழிற்சாலைகள் சட்டத்தின்படியான உரிமத்தினை இணையதள மூலம் வரும் 31.10.2026-க்குள் புதுப்பித்துக்கொள்ள வேண்டும். உரிமம் புதுப்பித்தலுக்காக அலுவலகத்திற்கு நேரில் வர தேவையில்லை. 2027-ம் ஆண்டிற்கான உரிமம் புதுப்பித்தலை www.dish.tn.gov.in என்ற இணையதளம் மூலம் மட்டுமே உரிய கட்டணம் செலுத்தி புதுப்பிக்க வேண்டும். விண்ணப்பித்தவுடனே புதுப்பிக்கப்பட்டதற்கான உரிமத்தை பதிவிறக்கம் செய்து கொள்ளலாம். இதற்காக தொழிலகப் பாதுகாப்பு மற்றும் சுகாதார இணை இயக்குநர் அலுவலகத்திற்கு வரவேண்டிய அவசியம் இல்லை. உரிமத் திருத்தம், உரிமம் மாற்றம் ஆகியவற்றிற்கு இணையதள வழி மூலமே உரிய கட்டணம் செலுத்தி விண்ணப்பிக்க வேண்டும். அக்டோபர் 31-ந் தேதிக்கு பின்னர் சமர்ப்பிக்கப்படும் விண்ணப்பங்கள் மீது ஏற்கனவே நடைமுறையில் உள்ள தாமத கட்டணம் செலுத்த நேரிடும். உரிய உரிமம் இன்றி செயல்படும் தொழிற்சாலைகள் நீதிமன்ற நடவடிக்கைக்கு உட்பட்டவையாகும். எனவே கடைசி நேர நெருக்கடி மற்றும் இணையதள வழி சிக்கல்களை தவிர்க்க தொழிற்சாலை நிர்வாகங்கள் முன்கூட்டியே விண்ணப்பிக்குமாறு கோரப்படுகிறது. விருதுநகர் மாவட்டத்தில் உள்ள பட்டாசு தொழிற்சாலைகளுக்கு PESO மற்றும் DM உரிமம் பெற்ற பட்டாசு தொழிற்சாலைகளின் வரைபடத்தில் அனுமதிக்கப்பட்ட தொழிலாளர்களின் எண்ணிக்கைக்கு (தொழிற்சாலைகள் சட்டம் விதி-4, G.O. Ms. No. 50, Labour welfare and Skill Development (M2), 27 th May 2025) ஏற்ப மட்டுமே உரிமம் புதுப்பிக்கப்படும். இதேபோல் ஒப்பந்த தொழிலாளர் (முறைப்படுத்துதல் மற்றும் நீக்குதல்) சட்டம் 1970 மற்றும் தமிழ்நாடு ஒப்பந்த தொழிலாளர் விதிகள் 1975 மற்றும் மாநிலம் விட்டு மாநிலம் இடம் பெயரும் தொழிலாளர்கள் சட்டம் 1979 மற்றும் தமிழ்நாடு விதிகள் 1983-ன் கீழான உரிமத்தையும் ஒப்பந்ததாரர்கள் இணையவழி மூலம் உரிய கட்டணம் செலுத்தி உரிமத்தை புதுப்பித்துக்கொள்ளலாம்.மேலும் விபரங்களுக்கு No. 112 முதல் தளம், புதிய மாவட்ட ஆட்சியர் அலுவலக வளாகம், விருதுநகர், என்ற முகவரியில் உள்ள தொழிலகப் பாதுகாப்பு மற்றும் சுகாதார இணை இயக்குநர் அலுவலகத்தை தொடர்பு கொள்ளலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.

நான்கு வழிச்சாலைக்காக நிலம் வழங்கி இழப்பீடு பெறாதவர்களுக்கான சிறப்பு முகாம் நடைபெறுகிறது.

செய்தி மக்கள் தொடர்பு அலுவலகம் விருதுநகர் மாவட்டம்

Oct 10, 2026

நான்கு வழிச்சாலைக்காக நிலம் வழங்கி இழப்பீடு பெறாதவர்களுக்கான சிறப்பு முகாம் நடைபெறுகிறது.

விருதுநகர் மாவட்டம் வடுகபட்டி – தெற்குவெங்காநல்லூர் வரை தேசிய நெடுஞ்சாலை - 744 அமைக்கும் பணிக்காக கையகப்படுத்தப்பட்ட நிலங்களுக்குரிய நில உடைமைதாரர்களிடமிருந்து ஆவணங்களை பெற்று கையகப்படுத்தப்பட்ட நிலங்களுக்கு இழப்பீட்டுத்தொகை வழங்கும் பொருட்டு நில உடைமைதாரர்களிடமிருந்து நில ஆவணங்களை பெறுவதற்கான சிறப்பு முகாம் கிராம நிர்வாக அலுவலங்களில் நடைபெற உள்ளது.அதனடிப்படையில், இராஜபாளையம் வட்டத்தில் 13.10.2026 மேலூர்துரைசாமிபுரம் கிராமத்திலும், 16.10.2026 இளந்திரைகொண்டான் கிராமத்திலும், 23.10.2026 சமுசிகாபுரம் கிராமத்திலும், 28.10.2026 புத்தூர் கிராமத்திலும், 02.11.2026 தெற்குவெங்காநல்லூர் கிராமத்திலும், 06.11.2026 மேலராஜகுலராமன் கிராமத்திலும்,திருவில்லிபுத்தூர் வட்டத்தில் 15.10.2026 நத்தம்பட்டி கிராமத்திலும், 21.10.2026 அத்திகுளம் செங்குளம் கிராமத்திலும், 27.10.2026 அயன் நாச்சியார்கோவில், நல்லிங்கப்பேரி, தெய்வேந்திரி கிராமங்களிலும், 29.10.2026 பூவாணி, முத்துவெங்கட்ராயபுரம் கிராமங்களிலும், 03.11.2026 களத்தூர், எஸ்.அம்மாப்பட்டி, வடுகப்பட்டி கிராமங்களிலும், 05.11.2026 பிள்ளையார்குளம் கிராமத்திலும், 10.11.2026 குன்னூர் கிராமத்திலும், 12.11.2026 விழுப்பனூர், பாட்டக்குளம் சல்லிப்பட்டி கிராமங்களிலும், நடைபெற உள்ளது. ஆகவே, தேசிய நெடுஞ்சாலை – 744 அமைக்கும் பணிக்காக கையகப்படுத்தப்பட்ட நிலங்களுக்கான உரிமை குறித்த ஆவணங்களை இதுவரை சமர்ப்பிக்காத நிலஉடைமைதாரர்கள் இம்முகாம்களில் கலந்து கொண்டு ஆவணங்களை சமர்ப்பித்து பயன்பெற்றுக் கொள்ளலாம் என மாவட்ட ஆட்சித்தலைவர் திருமதி ஷரண்யா அறி ,I A S.,அவர்கள் தெரிவித்துள்ளார்.

விருதுநகர் தங்கம்மாள் பெரியசாமி நகராட்சி பெண்கள் மேல்நிலைப்பள்ளியில் பயிலும் மாணவிகள் பயன்பெறும் வகையில் புதிய வழித்தட பேருந்து சேவையினை மாவட்ட ஆட்சித்தலைவர் அவர்கள் தொடங்கி வைத்தார்.

செய்தி மக்கள் தொடர்பு அலுவலகம் விருதுநகர் மாவட்டம்

Oct 09, 2026

விருதுநகர் தங்கம்மாள் பெரியசாமி நகராட்சி பெண்கள் மேல்நிலைப்பள்ளியில் பயிலும் மாணவிகள் பயன்பெறும் வகையில் புதிய வழித்தட பேருந்து சேவையினை மாவட்ட ஆட்சித்தலைவர் அவர்கள் தொடங்கி வைத்தார்.

விருதுநகர் மாவட்ட ஆட்சித்தலைவர் திருமதி ஷரண்யா அறி, I A S., அவர்கள், விருதுநகர் சட்டமன்ற உறுப்பினர் திரு.பி.செல்வம் அவர்கள் முன்னிலையில், விருதுநகர் தங்கம்மாள் பெரியசாமி நகராட்சி பெண்கள் மேல்நிலைப்பள்ளியில் பயிலும் மாணவிகள் பயன்பெறும் வகையில் புதிய வழித்தட பேருந்து சேவையினை (08.10.2026) கொடியசைத்து தொடங்கி வைத்து மாணவிகளுடன் அரசுப்பேருந்தில் பயணம் மேற்கொண்டார்.விருதுநகர் தங்கம்மாள் பெரியசாமி நகராட்சி பெண்கள் மேல்நிலைப் பள்ளியில் சுமார் 500க்கும் மேற்பட்ட மாணவிகள் பயின்று வருகின்றனர்.இப்பள்ளிக்கு வரும் மாணவிகள் அரசு பேருந்துகளில் அல்லம்பட்டி விலக்கில் உள்ள பேருந்து நிறுத்தத்தில் இறங்கி சுமார் 700 மீட்டர் பள்ளிக்கு நடந்து சென்று வந்தனர். இதன் காரணமாக பள்ளிக்கு காலதாமதமாக செல்வதும், போக்குவத்து நெரிசலும் ஏற்பட்டு வந்தது. ஆகையால், பள்ளிக்கு சென்று வர ஏதுவாக பள்ளியிலிருந்து எம்.எஸ்.பி.நாடார் நகராட்சி பேருந்து நிலையம் வரை அரசுப் பேருந்து வழித்தட சேவை செய்ய வேண்டும் என பள்ளி நிர்வாகம், பெற்றோர் மற்றும் மாணவிகள் கோரிக்கை வைத்தனர்.அந்த கோரிக்கையினை ஏற்று பள்ளியில் பயிலும் மாணவிகள் பயன்பெறும் வகையில், பள்ளி நேரங்களான காலை 08.20 மணிக்கு விருதுநகர் எம்.எஸ்.பி.நாடார் நகராட்சி பேருந்து நிலையத்திலிருந்து புறப்பட்டு பள்ளிக்கும் மற்றும் மாலை 04.05 மணிக்கு பள்ளியில் இருந்து புறப்பட்டு விருதுநகர் எம்.எஸ்.பி.நாடார் நகராட்சி பேருந்து நிலையத்திற்கு சென்றடையும் வகையில் புதிய வழித்தட பேருந்து சேவை தொடங்கி வைக்கப்பட்டுள்ளது என மாவட்ட ஆட்சித்தலைவர்அவர்கள் தெரிவித்துள்ளார்.இந்நிகழ்வில் முதன்மை கல்வி அலுவலர் திரு.அரவிந்தன், அரசு அலுவலர்கள், போக்குவரத்துத்துறை அலுவலர்கள், பள்ளி தலைமையாசிரியர், பள்ளி ஆசிரியர்கள், மாணவிகள் உட்பட பலர் கலந்து கொண்டனர்.