25 YEARS OF EXCELLENCE
Weather: -
Friday Oct 23, 2026
09:30:46am
Weather: -
Friday Oct 23, 2026
09:30:46am
தமிழ்நாடு அரசு வலுவான மருத்துவக் கட்டமைப்பு மற்றும் திறமையான மருத்துவப் பணியாளர்களின் மூலம், தமிழ்நாட்டில் தாய் மற்றும் சேய் நலச் சேவைகள் தொடர்ந்து வலுப்படுத்தப்பட்டு வருகின்றன.அந்த வகையில், அரசு மருத்துவமனைகளில் பிறக்கும் குழந்தைகளைச் சிறப்பிக்கும் வகையிலும், தமிழர் பண்பாடு மற்றும் கலாச்சாரத்தில் தாய்மாமன் ஏற்றுள்ள அன்பும், அக்கறை நிறைந்த பாசமும் பிரதிபலிக்கும் வகையிலும், "தாய்மாமன் தங்க மோதிரம் திட்டம்" என்ற சிறப்பு திட்டத்தின் கீழ், 22.06.2026 அன்று முதல், அரசு மருத்துவமனைகளில் பிறந்த ஒவ்வொரு குழந்தைக்கும் ஒரு கிராம் தங்க மோதிரம் வழங்கப்படுகிறது.மாவட்டத்தில் அரசு மருத்துவமனைகளில் நாளொன்றுக்கு சராசரியாக 25 முதல் 30 குழந்தைகள் பிறக்கின்றன. விருதுநகர் மாவட்டத்தில் இத்திட்டத்திற்காக மொத்தம் 5 வட்டார தலைமை மருத்துவமனைகள் மற்றும் 72 ஆரம்ப சுகாதார நிலையங்கள் அமைக்கப்பட்டுள்ளன. ஜூன் 22.06.2026 முதல் 27.09.2026 வரை அரசு மருத்துவமனையில் பிறந்த குழந்தைகளுக்கு அந்தந்த அரசு மருத்துவமனைகளில் தலா 1 கிராம் தங்க மோதிரங்கள் வழங்கப்பட்டுள்ளன.அதனடிப்படையில், விருதுநகர் அரசு மருத்துவக்கல்லூரி மருத்துவமனையில் 538 குழந்தைகளுக்கும், அருப்புக்கோட்டை அரசு மருத்துவமனையில் 621 குழந்தைகளுக்கும், சிவகாசி அரசு மருத்துவமனையில் 885 குழந்தைகளுக்கும், இராஜபாளையம் அரசு மருத்துவமனையில் 551 குழந்தைகளுக்கும், ஸ்ரீவில்லிபுத்தூர் அரசு மருத்துவமனையில் 503 குழந்தைகளுக்கும் என மொத்தம் 3098 குழந்தைகளுக்கு தலா 1 கிராம் தங்க மோதிரங்கள் வழங்கப்பட்டுள்ளன.மேலும், 28.09.2026 முதல் அரசு மருத்துவமனைகள் மற்றும் ஆரம்ப சுகாதார நிலையங்களில் பிரசவிக்கும் குழந்தைகளுக்கு அவர்கள் மருத்துவமனையிலிருந்து வீட்டிற்கு செல்லும்போதே தாய்மாமன் தங்க மோதிரம் கொடுத்து அனுப்பி வைக்கப்படுகிறது என மாவட்ட ஆட்சித்தலைவர் திருமதி ஷரண்யா அறி I A S ., அவர்கள் தெரிவித்துள்ளார்.விருதுநகரைச் சேர்ந்த திருமதி. மெர்லின் ஏஞ்சல் அவர்கள் தெரிவிக்கையில் “எனது குழந்தைக்கு தங்க மோதிரம் கிடைத்த இந்த நாள் எங்கள் குடும்பத்திற்கு மிகவும் சிறப்பான நாளாகும். அரசு வழங்கிய இந்த உதவி பொருளாதார மதிப்பை விட எங்களுக்கு அளிக்கும் மகிழ்ச்சியும் அங்கீகாரமும் மிகப்பெரியது. எங்கள் குழந்தையின் மீது அரசு காட்டும் அக்கறையை எண்ணி பெருமையாக உள்ளது. இந்த நல்ல திட்டத்தை செயல்படுத்திய அரசுக்கு எங்களது குடும்பத்தின் சார்பில் நன்றியை தெரிவித்துக் கொள்கிறேன்.திருமதி. சங்கீதா அவர்கள் தெரிவிக்கையில்எனது குழந்தைக்கு அரசு சார்பில் தங்க மோதிரம் வழங்கியது எங்களுக்கு மிகவும் நெகிழ்ச்சியான தருணமாக இருந்தது. குழந்தை வளர்ந்து பெரியவராகும்போது, இந்த மோதிரம் அரசு வழங்கிய அன்பையும் ஆதரவையும் நினைவுபடுத்தும். குழந்தைகளின் நலனை முன்னிறுத்தி செயல்பட்டு வரும் அரசுக்கு எங்களது குடும்பத்தின் சார்பில் நன்றியை தெரிவித்துக் கொள்கிறேன் என தெரிவித்தனர்.”இந்த தாய்மாமன் தங்க மோதிரம் திட்டம் அரசு மருத்துவமனைகளில் குழந்தை பிறப்பை ஊக்குவிக்கும் வகையில் அமைந்துள்ளதோடு, அரசு மருத்துவமனைகளில் பிரசவம் மேற்கொள்ளும் பெண்களுக்கு அரசு மருத்துவ சேவைகள் மீதான நம்பிக்கையை அதிகரிப்பதாகவும், ஏழை மற்றும் பொருளாதாரத்தில் பின்தங்கிய குடும்பங்களைச் சேர்ந்த குழந்தைகளின் பிறப்பை மகிழ்ச்சியுடன் வரவேற்று கௌரவிக்கும் வாய்ப்பையும் ஏற்படுத்துகிறது.”
விருதுநகர் மாவட்ட ஆட்சியர் அலுவலக கூட்டரங்கில் (08.10.2026) திருவில்லிபுத்தூர் மேகமலை புலிகள் காப்பகம் சார்பில் வன உயிரின வார விழா- 2026 நிறைவு நிகழ்ச்சி மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் நடைபெற்றது.ஒவ்வொரு ஆண்டும் அக்டோபர் 2 முதல் அக்டோபர் 8 வரை உள்ள நாட்கள் வன உயிரின வாரவிழாவாக வனத்துறையினரால் அனுசரிக்கப்படுகிறது. வனங்களில் வாழும் அனைத்து விலங்குகள் மற்றும் உயிரினங்களை பாதுகாப்பது பற்றிய விழிப்புணர்வு அனைவரையும் சென்றடைவதே இதன் நோக்கமாகும்.வனப்பாதுகாப்பு குறித்து சிறுவயதிலேயே அறிந்து ஈடுபடுவதால் அதன் முக்கியத்துவம் கூடுதலாக அறியலாம். வனப்பாதுகாப்பு என்பது வனத்துறையின் பணியாக மட்டும் இல்லாமல் அனைவரும் ஒருங்கிணைந்து ஒரு மக்கள் இயக்கமாக செயல்பட வேண்டும். இயற்கை உருவாக்கியுள்ள அனைத்து உயிரினங்களையும் பாதுகாப்பதற்கான பொறுப்பு நமக்கு இருக்கின்றது. அதுபோல, மனிதர்களும் இந்த பூமியில் வாழ்ந்தோம் சென்றோம் என்றில்லாமல் இந்த உலகிற்கு பயன்படும் வகையில் என்ன விட்டு சென்றோம் என்று திரும்பி பார்க்கும் பொழுது அது ஒரு ஏமாற்றமாக இருந்து விடக்கூடாது.காற்று மற்றும் ஒலி மாசுபாட்டை குறைத்திடும் வகையில் நம்முடைய செயல்பாடு இருக்க வேண்டும். இருக்கின்ற மரங்கள் மற்றும் தாவரங்களை பாதுகாப்பதோடு புதிய மரங்களை நட வேண்டும். மரம் நடுவதோடு மட்டுமல்லாமல் வைத்த மரம் தன்னைத்தானே பாதுகாத்து கொள்கின்ற நிலைக்கு வரும் வரை நாம் அதை வளர்த்து பராமரிக்க வேண்டும். பள்ளிக் குழந்தைகளிடையே மரங்களை நடுதல் மற்றும் பராமரித்தல் குறித்து பெருமளவு விழிப்புணர்வு ஏற்படுத்த வேண்டும்.அனுமதியின்றி வனப்பகுதிகளுக்கு செல்வதும், வனவிலங்குகளுக்கு இடையூறு செய்யும் வகையிலான செயல்பாடுகளையும் தவிர்க்க வேண்டும். இதுபோன்ற செயல்களை நாம் ஒவ்வொரு நாளும் கடைபிடிப்பதன் மூலம் இந்த உலகிற்கு ஒரு நேர்மறையான தாக்கத்தை விட்டுச்செல்ல முடியும். அதற்கான முயற்சிகளை அனைவரும் மாபெரும் இயக்கமாக இணைந்து செய்ய வேண்டும் என மாவட்ட ஆட்சித்தலைவர் திருமதி ஷரண்யா அறி இ.ஆ.ப., அவர்கள் தெரிவித்தார்.பின்னர், வன உயிரின வார விழாவை முன்னிட்டு பள்ளி, கல்லூரி மாணவர்களிடையே நடத்தப்பட்ட பல்வேறு போட்டிகளில் வெற்றி பெற்ற மாணவர்களுக்கு மாவட்ட ஆட்சித்தலைவர் அவர்கள் பாராட்டுச் சான்றிதழ்களை வழங்கினார்.இந்நிகழ்ச்சியில், துணை இயக்குநர்(திருவில்லிபுத்தூர் மேகமலை புலிகள் காப்பகம்) திரு.ரவி மீனா இ.வ.ப., உதவி வன பாதுகாவலர்(ஸ்ரீவில்லிபுத்தூர்) திரு.ஞானப்பழம், வன சரக அலுவலர்(விருதுநகர்) திரு.சக்திவேல், வனத்துறை அலுவலர்கள், அரசு அலுவலர்கள், பள்ளி, கல்லூரி மாணவ, மாணவியர்கள் உட்பட பலர் கலந்து கொண்டனர்.
விருதுநகர் மாவட்ட ஆட்சியர் அலுவலகத்தில் (08.10.2026) காசநோய் இல்லா இந்தியா இயக்கம் துவக்க விழா மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் நடைபெற்றது.நிகழ்வில் காசநோய் குறித்த விழிப்புணர்வு உறுதிமொழியினை மாவட்ட ஆட்சித்தலைவர் அவர்கள் தலைமையில் அனைவரும் ஏற்றுக்கொண்டனர்.இதனைத் தொடர்ந்து 2025-ஆம் ஆண்டில் காசநோய் இல்லாத 24 ஊராட்சிகளுக்கு பாராட்டு சான்றிதழ்களையும், காசநோய் ஒழிப்பு குறித்த பல்வேறு விழிப்புணர்வு போட்டிகளில் வெற்றி பெற்ற தன்னார்வ மாணவர்களுக்கு பாராட்டு சான்றிதழ்களையும் மாவட்ட ஆட்சித்தலைவர் அவர்கள் வழங்கினார்.காசநோய் இல்லா இந்தியா இயக்கத்தின் ஒரு முக்கியப் பகுதியாக, காசநோய் ஒழிப்பில் இளைஞர்களின் பங்களிப்பை மேம்படுத்துவதற்காக 'ஜோஷ்' (JOSH - Joint Squad for Health) அணிகள் தொடங்கி வைக்கப்பட்டுள்ளது.இந்த அணிகள் காசநோய் தொற்று குறித்து வீடு தோறும் நடைபெறும் கணக்கெடுப்பில், மை பாரத் (My Bharat) தன்னார்வலர்கள் மற்றும் தேசிய மாணவர் படையினர் (NCC) இணைந்து கண்காணிப்பு அலுவலரின் மேற்பார்வையில் மதிப்பீடு செய்வார்கள். இம்முயற்சியின் மூலம் சமூகத்தின் பங்கேற்பை வலுப்படுத்துவதுடன், காசநோய் அறிகுறிகள் உள்ளவர்கள் தாமதமின்றி மருத்துவப் பரிசோதனை மேற்கொண்டு, உரிய நோயறிதல் மற்றும் சிகிச்சை சேவைகளைப் பெற ஊக்குவிக்கப்படுவார்கள்.மக்கள் தொகை அடர்த்தி அதிகமாக உள்ள இந்தியாவில் மக்கள் வெளியே தெரியாத மறைமுக காசநோயின் தொற்றால் பாதிக்கப்பட்டுள்ளனர். 2030ம் ஆண்டிற்குள் காசநோயை ஒழித்துவிட வேண்டும் என்கிற நோக்கில் நடவடிக்கைகளை அரசு எடுத்து வருகிறது.விருதுநகர் மாவட்டத்தில் 1450 காசநோய் பயனாளிகள் சிகிச்சை எடுத்து வருகின்றனர். 11 காசநோய் அலகுகளிலும் CBNAAT காசநோய் சளி பரிசோதனை அனைத்து அரசு மருத்துவமனைகளிலும் இலவசமாக வழங்கப்படுகின்றது. நடமாடும் எக்ஸ்ரே வாகனம் மூலம் (X -Ray) வீடுகளுக்கே சென்று இலவசமாக பரிசோதனை செய்யப்படுகின்றது.2030-ஆம் ஆண்டிற்குள் காசநோயை முடிவுக்கு கொண்டு வர முனைப்புடன் செயல்படும் அரசோடு, அனைத்து அரசு, தனியார் துறைகள், இளைஞர்கள் மற்றும் சமூக நல அக்கறை உள்ள நிறுவனங்கள் இணைந்து செயல்பட்டு காசநோய் இல்லாத இந்தியாவை உருவாக்கிட வேண்டும் என மாவட்ட ஆட்சித்தலைவர் அவர்கள் தெரிவித்தார்.இந்நிகழ்ச்சியில் விருதுநகர் அரசு மருத்துவக்கல்லூரி முதல்வர் மரு.அமுதா ராணி, மாவட்ட சுகாதார அலுவலர்(விருதுநகர்) மரு.யசோதாமணி, துணை இயக்குநர் (காசம்) மரு.கே.பி.இராஜன், இளைஞர் நல அலுவலர் திருமதி காவியா முத்துலட்சுமி, மாவட்ட காசநோய் திட்ட ஒருங்கிணைப்பாளர்கள், ஊராட்சி செயலாளர்கள், தன்னார்வ மற்றும் தேசிய மாணவர் படை மாணவர்கள் உட்பட பலர் கலந்து கொண்டனர்.
தமிழ்நாட்டைச் சேர்ந்த அனைத்து பிரிவினரையும் உள்ளடக்கிய 600 கிறித்துவர்கள் பயனடையும் வகையில் ஜெருசேலம் புனித பயணம் மேற்கொண்டு திரும்பும் 550 கிறித்துவர்களுக்கு நபர் ஒருவருக்கு ரூ.37,000/- வீதமும் 50 கன்னியாஸ்திரிகள்/ அருட்சகோதரிகளுக்கு நபர் ஒருவருக்கு ரூ.60,000/-வீதமும் ECS முறையில் நேரடியாக மானியம் வழங்கும் திட்டத்தின் கீழ் நடப்பு ஆண்டில் ஜெருசேலம் புனித பயணம் மேற்கொண்டு திரும்பும் கிறித்துவ மத பயனாளிகளிடம் இருந்து விண்ணப்பங்கள் வரவேற்கப்படுகிறது.இதற்கான விண்ணப்ப படிவத்தினை விருதுநகர் மாவட்ட ஆட்சியர் அலுவலகத்தில் இயங்கும் மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகத்திலிருந்து (5-வது தளம், அறை எண்-505) கட்டணமின்றி பெறலாம். மேலும் www.bcmbcmw.tn.gov.in என்ற இணையத்தளத்திலிருந்து பதிவிறக்கம் செய்து கொள்ளலாம். பூர்த்தி செய்யப்பட்ட விண்ணப்பத்தினை 31.01.2027-க்குள் உரிய ஆவணங்களுடன் அனுப்ப வேண்டிய முகவரி -ஆணையர், சிறுபான்மையினர் நலத்துறை, கலசமஹால் பராம்பரிய கட்டடம், முதல்தளம், சேப்பாக்கம், சென்னை – 600005 என்ற முகவரிக்கு அனுப்பி வைக்கலாம் என மாவட்ட ஆட்சித்தலைவர் திருமதி ஷரண்யா அறி I A S ., அவர்கள் தெரிவித்துள்ளார்.
01.01.2027 தகுதிநாளாக கொண்டு, 18 வயது பூர்த்தியடையும், இளம் வாக்காளர்கள், வாக்காளர் பட்டியலில் பெயரை சேர்க்க ஏதுவாக, விருதுநகர் மாவட்டம் முழுவதும் 10.10.2026 அன்று (காலை 9.00 மணி முதல் மாலை 5.00 மணி வரை) அனைத்து வாக்குச்சாவடி மையங்களிலும் சிறப்பு முகாம் நடைபெற உள்ளது.எனவே, 10.10.2026 அன்று நடைபெறும் சிறப்பு முகாமில், வாக்குச்சாவடி நிலை அலுவலர்களிடம் (BLO), புதிதாக வாக்காளர் பட்டியலில் பெயர் சேர்க்க தேவையான ஆவணங்களுடன் விண்ணப்பிக்கலாம் என மாவட்ட ஆட்சித்தலைவர் திருமதி ஷரண்யா அறி I A S., அவர்கள் தெரிவித்துள்ளார்.
தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள், விருதுநகர் மாவட்டம், சிவகாசி - திருத்தங்கலில் புதிய இரயில்வே மேம்பாலம் கட்டும் பணிகள் நடைபெற்று வருவதை மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில்(18.01.2026) பார்வையிட்டு ஆய்வு மேற்கொண்டார். தமிழ்நாடு முதலமைச்சர் அவர்களின் வழிகாட்டுதலின்படி, பொதுமக்களின் பாதுகாப்பான மற்றும் சீரான போக்குவரத்தை உறுதி செய்வதற்காக தமிழ்நாடு அரசு பல்வேறு நடவடிக்கைகளை மேற்கொண்டு வருகிறது. குறிப்பாக, நகர்ப்புறங்கள் மற்றும் முக்கிய சாலைகளில் அதிகரித்து வரும் வாகனப் போக்குவரத்தை கருத்தில் கொண்டு, போக்குவரத்து நெரிசலை குறைப்பதற்கான பல்வேறு உள்கட்டமைப்பு மேம்பாட்டு பணிகள் மேற்கொள்ளப்பட்டு வருகின்றன.சிவகாசி - திருத்தங்கல் சாலையில் இரயில் போக்குவரத்திற்காக அடிக்கடி மூடப்படுவதால், பொதுமக்கள் நீண்ட வரிசையில் காத்திருக்க வேண்டியுள்ளது. மேலும் இப்பகுதி பல தொழிற்சாலைகள், பள்ளிகள், கல்லூரிகள் இயக்கும் இடமாக இருப்பதால், தொழிலாளர்கள் மற்றும் மாணவர்கள் மிகுந்த சிரமத்தை களையும் வகையில், ரூ.45.60 கோடி மதிப்பில் 609.28 மீ நீளம், 8.5 மீ அகலத்தில் 17 தூண்களுடன் ரயில்வே மேம்பாலம் அமைக்கும் பணிகள் நடைபெற்று வருகின்றன.மேம்பாலம் கட்டும் பணிகளின் முன்னேற்றம், மேற்கொள்ளப்பட்டுள்ள பணிகள், நிறைவேற்றப்பட வேண்டிய பணிகள் மற்றும் பணிகளை நிறைவு செய்வதற்கான கால அட்டவணை குறித்து அலுவலர்களிடம் கேட்டறிந்து, பொதுமக்கள் மற்றும் வாகன ஓட்டிகளின் பாதுகாப்பிற்கு முக்கியத்துவம் அளித்து, பணிகள் நடைபெறும் பகுதிகளில் தேவையான தடுப்புகள், எச்சரிக்கை பலகைகள் மற்றும் போக்குவரத்து வழிகாட்டுதல்களை முறையாக அமைத்து, எவ்வித இடையூறும் ஏற்படாத வகையில் உரிய பாதுகாப்பு நடவடிக்கைகளுடன் மேற்கொள்ளப்பட அறிவுறுத்தப்பட்டுள்ளது. மேலும், எதிர்வரும் பண்டிகை காலங்களில் நெரிசலை தடுக்க மாற்று வழிகளை பயன்படுத்துவது குறித்தும் ஆலோசிக்கப்பட்டது.திருத்தங்கல் புதிய இரயில்வே மேம்பாலப் பணிகளை விரைந்து, தரமான முறையில் நிறைவு செய்து பொதுமக்களின் பயன்பாட்டிற்கு கொண்டு வருவதற்குத் தேவையான அனைத்து நடவடிக்கைகளும் மேற்கொள்ள வேண்டும் என அலுவலர்களுக்கு அறிவுறுத்தப்பட்டுள்ளது என தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.இந்நிகழ்ச்சியில், நெடுஞ்சாலைத்துறை திருநெல்வேலி கோட்ட பொறியாளர் திரு.லிங்குசாமி(திட்டங்கள்), சிவகாசி சார் ஆட்சியர் திரு.முகமதி இர்பான் I A S., சிவகாசி மாநகராட்சி ஆணையர் திரு.கண்ணன், அரசு அலுவலர்கள் உட்பட பலர் கலந்து கொண்டனர்.
விருதுநகர் மாவட்டம், சிவகாசி நாரணாபுரத்தில் தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள், மாவட்ட ஆட்சித்தலைவர் திருமதி ஷரண்யா அறி I A S., அவர்கள் தலைமையில் கர்ப்பிணி தாய்மார்களுக்கு சமுதாய வளைகாப்பினை முன்னிட்டு சீர்வரிசை பொருட்களை (06.10.2026)வழங்கினார்.தமிழ்நாடு முதலமைச்சர் திரு.ச.ஜோசப் விஜய் அவர்கள் குழந்தைகளையும், பெண்களையும் தனது இரு கண்களாக பாவித்து பல்வேறு சிறப்பு திட்டங்களை ஏற்படுத்தி செயல்படுத்தி வருகிறார்கள்.பெண்களின் முன்னேற்றத்திற்கான வாய்ப்புகளை பொருளாதார பற்றாக்குறை எவ்விதத்திலும் தடை ஏற்படுத்தக்கூடாது என்பதற்காகவும், அவர்களை குறுகிய வட்டத்திற்குள் நிறுத்திடக்கூடாது என்பதற்காக வெற்றிப்பயணத் திட்டத்தினை ஏற்படுத்தி தமிழகம் எங்கும் கட்டணமில்லாமல் பயணம் செய்து தங்களது வாய்ப்புகளை வளர்த்துக்கொள்ள வழியை ஏற்படுத்தி தந்துள்ளார்.பிறக்கும் குழந்தைகளுக்கு உற்ற துணையாகவும், தாய்மாமனின் அன்பினை கற்றத்தரும் வகையிலும் அரசு மருத்துவமனைகளிலே மகப்பேறு சிகிச்சையினை மேற்கொள்ள வேண்டும் என்பதற்காக தாய்மாமன் தங்க மோதிரம் திட்டத்தினை ஏற்படுத்தி செயல்படுத்தி வருகிறார்.கர்ப்பிணி தாய்மார்கள் தனியாக இல்லை உங்களுடன் அரசும், இந்த சமுதாயமும் பக்க துணையாக உள்ளது என்பதனை சொல்லி தன்னம்பிக்கை ஏற்படுத்தும் விதமாக சமுதாய வளைகாப்பு திட்டத்தினை செயல்படுத்தி வருகிறார். தாய்மை என்பது ஒரு பெண்ணின் வாழ்க்கையில் மிக முக்கியமான மற்றும் மகிழ்ச்சியான கால கட்டமாகும். கர்ப்பிணி தாய்மார்கள் எவ்வித மன அழுத்தத்திற்கும் ஆளாகாமல் மன மகிழ்ச்சியுடன் பேறுகாலத்தை எதிர்கொள்ள வேண்டும் என்பதற்காக அவர்களுக்கு சமுதாய வளைகாப்பு நடத்தப்படுகிறது.ஒரு குழந்தையின் வளர்ச்சியானது கருவாக உருவான நாளிலிருந்தே ஆரம்பமாகிறது. இதனை மனதிற்கொண்டு கர்ப்பிணி பெண்கள், கர்ப்பகாலத்தில் மகிழ்ச்சியாகவும், ஆரோக்கியமாகவும் இருந்தால் தான், அவர்களுக்கு பிறக்கும் குழந்தை ஆரோக்கியமான, அறிவான குழந்தையாக இருக்கும் என்பதற்காக ஏற்படுத்தப்பட்ட சிறந்த திட்டம் தான் சமுதாய வளைகாப்பு திட்டமாகும்.பொருளாதார வசதி குறைவாக உள்ள குடும்பத்தினரால் நடத்திட இயலாத சூழ்நிலையினை மாற்றுவதற்காகவும், சமூக பொருளாதார ஏற்றத்தாழ்வின்றி இன்று அனைவருக்கும் சமுதாய வளைகாப்பு நடத்திட வேண்டும் என்பதற்காக இத்திட்டம் ஏற்படுத்தப்பட்டு அனைத்து கர்ப்பிணி பெண்களும் பயனடைந்து வருகின்றனர்.இத்திட்டத்தின் வாயிலாக, பாதுகாப்பான தாய்மையை உறுதி செய்தல், கர்ப்பகால பராமரிப்பு குறித்த தகவல்கள் கர்ப்பிணித் தாய்மார்களை சென்றடைய செய்து அவர்கள் அதை பின்பற்றுவதை உறுதி செய்தல், கர்ப்பிணிகள் இறப்பு விகிதத்தை குறைத்தல். சிசு மரணத்தை தவிர்த்தல், ஆரோக்கியமான அறிவான குழந்தைகள் பிறப்பதை உறுதிப்படுத்துதல், குழந்தைகளின் பிறப்பு எடை 3 கிலோவாக இருக்க வேண்டியதின் அவசியத்தை உணர்த்துதல், கர்ப்பகாலத்தில் ஏற்படும் பிரச்சனைகள் அதற்கான தீர்வுகள் குறித்து விழிப்புணர்வு எற்படுத்துதல், மருத்துவமனையில் பிரசவம் பார்த்துக் கொள்ள வேண்டியதின் அவசியத்தை உணர்த்துதல், குழந்தைகளின் வளர்ச்சிப் படிகள் குறித்து விழிப்புணர்வு ஏற்படுத்துதல், மகப்பேறு உதவித் திட்டங்கள் குறித்து விழிப்புணர்வு ஏற்படுத்துதல், தாய்ப்பாலின் அவசியம், நன்மைகள், இணை உணவின் அவசியம், குழந்தைகள் நோய் வாய்ப்படும் போது அளிக்கப்பட வேண்டிய கவனிப்பு போன்ற பல விவரங்கள் குறித்து விழிப்புணர்வு ஏற்படுத்துதல் போன்றவை குறித்து கர்ப்பிணி பெண்களுக்கு கற்றுத்தரவும், விழிப்புணர்வு ஏற்படுத்துவதற்காகவும் சமுதாய வளைகாப்பு நடத்தப்படுகிறது.கர்ப்பிணி தாய்மார்கள், மருத்துவர்கள் மற்றும் செவிலியர்கள் கூறும் அறிவுரை மற்றும் வழிமுறைகளை தவறாது பின்பற்றி அறிவான, ஆற்றல் மிக்க குழந்தை பேற்றினை பெற்றிட வேண்டும் எனதொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.நிகழ்ச்சியில் சிவகாசி சார் ஆட்சியர் திரு.முகமது இர்பான் I A S., ஒருங்கிணைந்த குழந்தைகள் வளர்ச்சி திட்ட அலுவலர் திருமதி ஷீலா சுந்தரி, குழந்தைகள் வளர்ச்சித் திட்ட பணியாளர்கள், கர்ப்பிணி பெண்கள் உட்பட பலர் கலந்து கொண்டனர்.
தமிழ்நாடு ஆதிதிராவிடர் வீட்டு வசதி மற்றும் மேம்பாட்டுக் கழகம் (தாட்கோ) மூலமாக ஆதிதிராவிடர் மற்றும் பழங்குடியினர் இளைஞர்களின் மேம்பாட்டுக்கு பல்வேறு திறன் அடிப்படையிலான பயிற்சிகள் வழங்கப்பட்டு வருகிறது. அதன் அடிப்படையில் தாட்கோ, மற்றும் தகவல் தொடர்பு தொழில்நுட்பக் கழகம் (ICT Academy) இணைந்து ஆதிதிராவிடர் மற்றும் பழங்குடியினர் இளைஞர்களுக்கு, சென்னை மாவட்டத்தில் மென் பொருள், வலைதளம் வடிவமைப்பாளர் மற்றும் பயன்பாட்டு மென்பொருள் மேம்பாட்டாளர் பயிற்சியும், கோயம்புத்தூர் மாவட்டத்தில் மென் பொருள், வலைதளம் வடிவமைப்பாளர், பயன்பாட்டு மென்பொருள் மேம்பாட்டாளர், தரவுப் பகுப்பாய்வாளர், நுண்நிதி நிர்வாகம் மற்றும் காப்பீட்டு முகவர் பயிற்சியும், மதுரை மாவட்டத்தில் தரவுப் பகுப்பாய்வாளர், மென் பொருள் வடிவமைப்பாளர், நுண்நிதி நிர்வாகம் மற்றும் காப்பீட்டு முகவர் போன்ற பயிற்சிகள் வழங்கப்படவுள்ளது.மென் பொருள் சார்ந்த பயிற்சி பெற இளங்கலை பொறியியல் மற்றும் பி.எஸ்.சி கணினி அறிவியல் ஆகிய பாடங்களில் பட்டம் பெற்று இருக்க வேண்டும். நிதி சார்ந்த பயிற்சிகள் பெற இளங்கலை வணிகவியல் மற்றும் இளங்கலை வணிக நிர்வாகவியல் ஆகிய பாடங்களில் பட்டம் பெற்று இருக்க வேண்டும். இப்பயிற்சியினை பெற ஆதிதிராவிடர் மற்றும் பழங்குடியினராகவும், வயது வரம்பு 18 முதல் 35 வயதிற்குள்ளும், மற்றும் குடும்ப ஆண்டு வருமானம் ரூ,3.00 லட்சத்திற்குள் இருக்க வேண்டும். இப்பயிற்சி சென்னை, கோயம்புத்தூர் மற்றும் மதுரை மாவட்டங்களில் நடைபெறவுள்ளது.இப்பயிற்சியினை முழுமையாக முடித்த இளைஞர்களுக்கு சான்றிதழ் மற்றும் பயிற்சி அளிக்கும் நிறுவனத்தின் மூலமாக தகுதியான நபர்களுக்கு வேலை வாய்ப்பும் ஏற்படுத்தி தரப்படும். இப்பயிற்சியில் சேருவதற்கு தாட்கோ இணையதளமான (www.tahdco.com) என்ற முகவரியில் தகுதியுடைய விண்ணப்பதாரர்கள் பதிவு செய்து இவ்வாய்ப்பினை பயன்படுத்திக்கொள்ளலாம் என மாவட்ட ஆட்சித்தலைவர் திருமதி ஷரண்யா அறி I A S, அவர்கள்தெரிவித்துள்ளார்.
தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் விருதுநகர் மாவட்டம் சிவகாசி அரசு மருத்துவமனையில் (05.10.2026) தாய்மாமன் தங்க மோதிரம் திட்டத்தின் கீழ் குழந்தைகளுக்கு தங்க மோதிரங்களை வழங்கினார்.தமிழ்நாடு அரசு பொதுமக்களின் நலனை கருத்தில் கொண்டு பல்வேறு நலத்திட்டங்களை செயல்படுத்தி வருகிறது. குறிப்பாக, குழந்தைகள் மற்றும் பெண்களின் நலன், தாய்–சேய் நலம், சமூகப் பாதுகாப்பு மற்றும் குடும்ப நலனை மேம்படுத்தும் வகையில் பல்வேறு சிறப்புத் திட்டங்கள் செயல்படுத்தப்பட்டு வருகின்றன. அந்த வகையில், குழந்தைகளின் பிறப்பை மகிழ்ச்சியுடன் வரவேற்று, அவர்களின் நலனையும் குடும்பங்களின் மகிழ்ச்சியையும் உறுதிப்படுத்தும் நோக்கில் “தாய்மாமன் தங்க மோதிரம்” திட்டம் செயல்படுத்தப்படுகிறது.இத்திட்டத்தின் கீழ், தகுதியுடைய குழந்தைகளுக்கு தங்க மோதிரம் வழங்கப்படுவது, குழந்தையின் பிறப்பை குடும்பத்தினர் மகிழ்ச்சியுடன் கொண்டாடுவதோடு, அரசின் சமூக நலப் பாதுகாப்பு நடவடிக்கைகளின் ஒரு பகுதியாகவும் அமைகிறது.விருதுநகர் மாவட்டத்தில் இத்திட்டத்திற்காக மொத்தம் 5 வட்டார தலைமை மருத்துவமனைகள் மற்றும் 72 ஆரம்ப சுகாதார நிலையங்கள் அமைக்கப்பட்டுள்ளன. ஜூன் 22.06.2026 முதல் 27.09.2026 வரை அரசு மருத்துவமனையில் பிறந்த குழந்தைகளுக்கு அந்தந்த அரசு மருத்துவமனைகளில் தலா 1 கிராம் தங்க மோதிரங்கள் வழங்கப்பட்டு வருகின்றன. அதனடிப்படையில், சிவகாசி அரசு மருத்துவமனையில் மொத்தம் பயனாளிகளான 885 குழந்தைகளுக்கு தங்க மோதிரம் வழங்கும் பணிகள் நடைபெற்று வருகின்றன. அதில் 04.10.2026 வரை சிவகாசி வட்டத்தைச் சேர்ந்த 347 குழந்தைகளுக்கும், சாத்தூர் வட்டத்தைச் சேர்ந்த 102 குழந்தைகளுக்கும், வெம்பக்கோட்டை வட்டத்தைச் சேர்ந்த 133 குழந்தைகளுக்கும் என மொத்தம் 582 குழந்தைகளுக்கு தங்க மோதிரங்கள் வழங்கப்பட்டுள்ளன.இன்றைய தினம் சிவகாசி வட்டத்தைச் சேர்ந்த 60 குழந்தைகள், வெம்பக்கோட்டை வட்டத்தைச் சேர்ந்த 13 குழந்தைகள், சாத்தூர் வட்டத்தைச் சேர்ந்த 34 குழந்தைகள் என மொத்தம் 107 குழந்தைகளுக்கு தாய்மாமன் தங்க மோதிரம் திட்டத்தின் கீழ் தலா 1 கிராம் தங்க மோதிரங்கள் வழங்கப்பட்டன. மீதமுள்ள 196 குழந்தைகளுக்கு தங்க மோதிரம் வழங்கும் பணிகள் நடைபெற்று வருகின்றன.மேலும் சிவகாசி அரசு மருத்துவமனையில் 28.09.2026 முதல் இன்று வரை 34 குழந்தைகள் பிறந்துள்ளன. அதில் சிகிச்சை பெற்று வீடு திரும்பிய 10 குழந்தைகளுக்கும் தங்க மோதிரம் கொடுத்து அனுப்பப்பட்டுள்ளது. மேலும் குழந்தை பிறந்து சிகிச்சை பெற்று வரும் குழந்தைகளுக்கும், அவர்கள் மருத்துவமனையிலிருந்து வீட்டிற்கு செல்லும்போது தாய்மாமன் தங்க மோதிரம் கொடுத்து அனுப்பி வைக்கப்படும்.எனவே, இத்திட்டத்தின் பயன்கள் அனைத்து பயனாளிகளையும் சென்றடையும் வகையில் ஏற்பாடுகள் செய்யப்பட்டுள்ளன. குழந்தைகள் நல்ல உடல்நலத்துடன் வளரவும், அவர்களின் எதிர்காலம் சிறப்பாக அமையவும் வாழ்த்துக்கள் என தொழில் முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.நிகழ்ச்சியில், மாவட்ட வருவாய் அலுவலர் திருமதி ஆனந்தி, இணை இயக்குநர் (மருத்துவ நலப் பணிகள்) மரு.காளிராஜ், சிவகாசி சார் ஆட்சியர் திரு.முகமது இர்பான்I A S., மருத்துவர்கள், அரசு அலுலவர்கள் உட்பட பலர் கலந்து கொண்டனர்.
தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் விருதுநகர் மாவட்டம், சிவகாசி என்.ஆர்.கே.இராஜரத்தினம் பேருந்து நிலையத்தில்(05.10.2026) வெற்றிப் பயணம் திட்டத்தின் கீழ் பயணம் மேற்கொள்ளும் பயனாளிகளுக்கு கட்டணமில்லா பயணச்சீட்டுகளை வழங்கி இத்திட்டம் குறித்து கலந்துரையாடினார்.தமிழ்நாடு அரசு, பொதுமக்களின் நலனை முன்னிறுத்தி பல்வேறு மக்கள் நலத்திட்டங்களை தொடர்ந்து செயல்படுத்தி வருகிறது. பொதுமக்களின் அன்றாட வாழ்க்கைக்கு தேவையான சேவைகள் எளிதாகவும், தடையின்றியும் கிடைக்க வேண்டும் என்பதே அரசின் முக்கிய நோக்கமாகும்.அந்த வகையில் தமிழ்நாடு அரசின் மகளிர் நலன் சார்ந்த முக்கியத் திட்டங்களில் ஒன்றான வெற்றிப் பயணம் 02.10.2026 அன்று தொடங்கி வைக்கப்பட்டுள்ளது. இத்திட்டம் மகளிர், திருநங்கைகள் மற்றும் மாற்றுத்திறனாளிகளின் பயணத் தேவையை கருத்தில் கொண்டு செயல்படுத்தப்பட்டு வருகிறது.இத்திட்டத்தின் கீழ், சிவகாசி கிளையிலிருந்து 30 நகர பேருந்துகள் மூலம் 218 நடைகளும், 9 புறநகர் பேருந்துகள் மூலம் 26 நடைகளும் என மொத்தம் 39 கட்டணமில்லா பேருந்துகள் மூலம் 244 நடைகள் இயக்கப்படுகின்றன.இத்திட்டம் மூலம் பயணம் மேற்கொள்ளும் பயனாளிகளுக்கு கட்டணமில்லா பயணச்சீட்டுகள் வழங்கப்படுவதன் மூலம், அவர்களின் அன்றாடப் பயணத் தேவைகளுக்கு ஆதரவாக அமைகிறது. குறிப்பாக, வேலைவாய்ப்பு, கல்வி, மருத்துவம், அரசு சேவைகள் உள்ளிட்ட பல்வேறு தேவைகளுக்காக பொதுப் போக்குவரத்தை பயன்படுத்தும் பயனாளிகளுக்கு இத்திட்டம் பயனுள்ளதாக உள்ளது.இத்திட்டத்தின் செயல்பாடுகள் குறித்து பயனாளிகளிடம் நேரடியாகக் கேட்டறிந்து அவர்கள் பெற்றுவரும் பயன்கள், எதிர்கொள்ளும் சிரமங்கள் மற்றும் தேவையான கூடுதல் வசதிகள் குறித்து கேட்டறியப்பட்டது. பொதுமக்கள் அரசின் நலத்திட்டங்களை முழுமையாக பயன்படுத்திக் கொண்டு, அதன் மூலம் கிடைக்கும் பயன்களைப் பெற்று பயன்பெற வேண்டும் என தொழில், முதலீட்டு ஊக்குவிப்பு மற்றும் வர்த்தகத்துறை அமைச்சர் செல்வி ச.கீர்த்தனா அவர்கள் தெரிவித்தார்.இந்நிகழ்ச்சியில் மாவட்ட வருவாய் அலுவலர் திருமதி ஆனந்தி, சிவகாசி சார் ஆட்சியர் திரு.முகமது இர்பான் I A S., சிவகாசி மாநகராட்சி ஆணையாளர் திரு.கண்ணன், அரசு அலுவலர்கள், போக்குவரத்துத்துறை அலுவலர்கள் மற்றும் பொதுமக்கள் உள்ளிட்டோர் கலந்து கொண்டனர்.
